Jonathan Motzfeldt-imut eqqaaniut

Kalaallit Nunaata ukiorpassuarni politikkikkut siuttorisimasaa Naalakkersuisuni Inatsisartunilu Siulittaasuusimasoq palasilu Jonathan Motzfeldt sisamanngorneq 26. oktober 2010 72-inik ukioqarluni toqukkut qimaguppoq.

Namminersornerullutik Oqartussaanerup sulissutigineqarnera eqqunneqarneralu Jonathan Motzfeldt-ip siuttuuffigaa soorlu aamma Namminersorneq pillugu Isumalioqatigiissitaq siulittaasuuffigisimagaa.

Jonathan Motzfeldt Qassimiuni inunngorpoq 25. september 1938 Ilinniarfissuarmiillu ilinniartitsisutut soraarummeerluni 1960-imi København-illu Universitet-ianit palasissatut exam. theol.-itut 1966-imi soraarummeerluni.

Nunatta Landsråderisimasaanut 1971-imi qinigaavoq Namminersornerullutillu Oqartussaaneq nunatsinni 1979-imi atulersinneqarmat siullerpaajulluni Naalakkersuisut Siulittaasuattut qinigaalluni. Peqatigitillugu Inatsisartuni siulittaasuuvoq 1979-imiit 1988-imut aammalu 2002-miit 2008-mut.

Jonathan Motzfeldt ukiorpassuarni politikkikkut suliaqarnermini tatigineqarluni akisussaaffippassuaqarsimavoq, paasissutissallu taakku quppernerup matuma ilaani ”paasissutissat” ataani atuarneqarsinnaapput.

Una Naalakkersuisut nittartagaanni Jonathan Motzfeldt-imik immikkoortoqartitsinerneq inuttaanik ataqqinninnermik eqqaaniaanermillu takutitsiniarneruvoq, paasissutissallu assigiinngitsut uani atuarneqarsinnaapput.