Aaqqissuusseqqinnermi suliassat kommuninut nuunneqartussat piffissalersorneqarnissaat

Januarip aallaqqaataa 2009 kommunit kattunneqarneranni akisussaaffiit sorliit kommuninut nuunneqarnissaat siunertalugu misissuinerit aallartereerput. Suliassat ikinnerpaamik 100 mio kruuninik naleqartut tassaassapput innarluutilinnik sullissineq, immikkut atuartitsineq suliassaqarfiillu allat.

- Suliassat sorliit KANUKOKA peqatigalugu isumaqatigiissutigineqarsinnanerat taavalu isumaqatiginninniarnissamut piffissaliussassat Inatsisartut ukiakkut ataatsimiilernerat sioqqullugu KANUKOKA peqatigalugu isumaqatigiissuteqarfigineqarsinnaanissaat Naalakkersuisut nuannaarutigaat. Suliassaqarfiit ataasiakkaat peqqissaartumik suliarineqarnissaat sulisullu toqqissisimanissaat isumaqatigiissummi qularnaarneqassapput, Naalakkersuisut siulittaasuat Hans Enoksen kommunini aaqqissuusseqqinnerni suliassat kommuninut nuunneqartussat piffissalersorneqarnissaat pillugit ullumi tusagassiortunik katersortitnerup kingorna oqarpoq.

Suliassat inuiaqatigiinnut pitsaanerpaamik akikinnerpaamillu suliarineqartarnissaat qulakkeerniarneqarpoq. Aaqqissuussaanermut ataatsimiititaliap isumaliutissiissutaa isumaqatiginniiarnerni tunngavigineqassaaq.

Ikaarsaarnermi ataatsimiititaliat, tassaasut kommunalbestyrelsinngorumaartussat, aaqqissuussinermut tunngasuteqartunik aalajangiisassapput. Suliassat kommuninut nuunneqarnerannut atatillugu kommunini sulisut aaqqissuussinermut peqataatinneqarnissaat Naalakkersuisut naatsorsuutigaat.

Naalakkersuisut KANUKOKA peqatigalugu suleriaqqinnissamut qilanaarput.

Hans Enoksen

Landsstyreformand

Annertunerusumik paasisaqarusukkuit Peter Olsen attavigisinnaavat, oqarasuaat 34 51 22,

email: pols@gh.gl

Isumaqatigiissut uani atuarneqarsinnaavoq.