Aatsitassanit isertitat unneqarissumik agguaanneqartarnissaat kissaataavoq

Tamanna aallaavigalugu pisariaqartippara kalaallit isumaasa erseqqissarnissaat.

Namminersorneq Pillugu Isumalioqatigiissitat Aningaasaqarnermut Inuussutissarsiutinillu Ineriartortitsinermut Suleqatigiissitaata ukioq manna martsimili isumaqatigiissutigereerpaa aatsitassarsiornermit isertitat siunissami Kalaallit Nunaata Namminersortup pisassagai, aatsitassanillu isertitat affaat ataatsimoortumik tapiissutinut ilanngaatigineqartassasut, tassa ukiumut 75 mio. koruuninik killiliussaq qaangerneqaraangat. Martsimi isumaqatigiissutigaarputtaaq uuliasiornermit isertitat ima amerlatigilissappata naalagaaffiup ataatsimoortumik tapiissutai unitsinneqarlutik taava Nunatta pisuussutaanit isertitat Danmarkip Kalaallit Nunaatalu akornanni qanoq agguaanneqartassanersut isumaqatigiinniutigilissagipput.

Kalaallit Nunaanni namminersorneq pillugu inatsisitaasassami tunngavissat tamakku qanoq oqaasertalersorneqarnissaat pillugu aasap ingerlanerani arlaleriarluni isumaqatigiinniartoqartarpoq. Apeqqutit tamakkiusavillugit isumaqatigiissutigereerpagut taamatuttaaq aatsitassarsiornermit akileraarutit akitsuutillu naalagaaffimmut avitseqatigiissutissagut qanoq naatsorsorneqartarnissaat ilanngullugu.

Apeqqut pingaarutilik ataasituaq uagut isitsinniit isigalugu avissaarutaasoq tassaavoq Kalaallit Nunaata kissaatigimmagu uuliasiornermik ingerlatseqatigiiffiit niuernermik tunngaveqartut pisortanillu pigineqartut ingerlanneqarsinnaaneranni naalagaaffiup Kalaallit Nunaatalu Namminersortup akornanni naligiittoqarnissaa.

DONG Qeqertarsuup kitaani imaani uuliasiornissamut akuersissuteqarfigineqarfissamini uuliamik nassaassagaluarpat taava naalagaaffiup piginneqataassutiminit akileraaruseereernikkut sinneqartoorutit nammineq pisassavai. Namminersornerullutik Oqartussat maannakkut aatsitassarsiorneq pillugu inatsit malillugu namminneq uuliasiornermik ingerlatseqatigiiffiliorsinnaapput niuernermik tunngaveqartumik ¿ akileraaruseereernikkullu sinneqartoorutit namminneq pisarlugit.

Maannakkut danskit tungaanniit siunnersuutigineqarpoq taamatut naligiissitsineq namminersulernissamik aaqqissuussinissami atuutissanngitsoq. Paarlattuanik siunnersuutigineqarsimavoq DONG-ip sinneqartoorutai akileraaruseereernikkut tamakkiisumik naalagaaffimmut pisassanngortinneqartassasut, kisiannili kalaallit uuliasiornermik ingerlatseqatigiiffiutaata niuernermik tunngaveqartup sinneqartoorutai akileraaruseereernikkut naalagaaffiup namminersortullu akornanni avinneqartassallutik.

Akuerisinnaanngilarput Kalaallit Nunaata Danmarkimit ajornerusumik pineqarnissaa. Danskit siunnersuutaannut nakkaannarutta Kalaallit Nunaannit Danmarkip uuliamit isertitarisalerumaagassat amerlanerpaartaat pisalissavai. Taamatut aaqqissuussineq ullumikkut aatsitassat pillugit aaqqissuussinermut naleqqiullugu ajorseriaataassaaq ilungersunartoq.

Soorunalimi naatsorsuutigaara Naalagaaffeqatigiinni naligiinnissamik tatigeqatigiinnissamillu tunngaviit Aningaasaqarneq Inuussutissarsiutinillu Ineriartortitsineq pillugu Suleqatigiissitap inerniliivinnerani eqqaamaneqarumaartut.

Inussiarnersumik inuulluaqqusillunga

Hans Enoksen

Naalakkersuisut siulittaasuat