Kanukoka.gl/Aaqqissuussaanermut isumalioqatigiissitat
Aaqqissuussaanermut Isumalioqatigiissitat qulingiluassaa Nuummi ataatsimeeqqammerput. Isumalioqatigiissitani ilaasortat nuannaarutigalugu paasivaat Isumalioqatigiissitat sulinerat pillugu nassuiaat Inatsisartuni partiit pinngitsoqaratik tigulluaraat.
Inatsisartut kissaatigaat Aaqqissuussaanermut Isumalioqatigiissitat sulinertik ingerlateqqissagaat nassuiaammi inassutaagallartut aamma Inatsisartuni oqaaseqaatigisat tunngavigalugit. Inatsisartut kissaatigaat maannangaaq aallarnisaasoqassasoq.
Oqaluuserisassaq Inatsisartuni siullermeerneqarmat oqariartuutit imaattut Isumalioqatigiissitamut apuunneqarput:
”Pingaarpoq nammagassat suliassallu Namminersornerusut kommunillu akornanni agguataarneqartarnerat pillugu aalajangiisoqarnissaa, aammalu tamatuma kingunerisaanik kommunit nutaamik aaqqissuuteqqinneqarnissaanni inuiaqatigiinnut iluaqutaasinnaasut nalilersornissaat. Aalajangersaasarata pissutsit taamaaginnartikkaluarutsigik aningaasaqarnikkut imminut napatissinnaalernissamut aammalu namminersulivinnissamut ineriartorneq akornusissavarput. Suliarisartakkavut kisiisa nalilerneqaatigisassanngilavut aammali suliarinngitsuukkavut nalilerneqaatigisariaqarpavut. Kommunit annerulernissaat toqqartariaqarparput suliassanik amerlanernik tigooraalissappata, inuiaqatigiinnut sullissinerup pitsaanerulerneranik inuttaasullu inatsisitigut illersugaanerulernerannik kinguneqassappata.”
Aaqqissuussaanermut isumalioqatigiit 2004-p naannginnerani ataatsimiittarnissaat:
København, 01.11.-03.11: Kommunernes Landsforening ataatsimeeqatigineqassaaq.
Nuuk, 04.11: Kommunalbestyrelse aamma innuttaasut ataatsimeeqatigineqassapput.
Nuuk, 05.11: Nuup, Paamiut aamma Ivittuut kommunii ataatsimeeqatigineqassapput.
Nuuk, 05.11: Ilqutariissutsimut Pisortaqarfiup aamma Peqqinnermut Pisortaqarfiup ataatsimeeqatigineri.
Qaqortoq aamma Narsaq, 22.11.-26.11: Nanortallip, Qaqortup aamma Narsap kommunii ataatsimeeqatigineqassapput.
Savalimmiut, 09.12.-12.12:
Qeqertarsuaq, 13.12.-15.12: Kangaatsiap, Aasiaat aamma Qeqertarsuup kommunii ataatsimeeqatigineqassapput.
2005-imi ataatsimiinnissanut pilersaarutaagallartut:
Sisimiut, 31.01.-02.02: Sisimiut aamma Maniitsup kommunii ataatsimeeqatigineqassapput.
Tasiilaq, 02.02-05.02: Ammassallip aamma Ittoqqortoormiit kommunii ataatsimeeqatigineqassapput.
Inussiarnersumik
Martha Labansen, siulittaasoq