Aalborgip Kommuneanik nutaamik suleqateqalerneq
Naalakkersuisut siulittaasuata Hans Enoksenip Aalborgip Kommunea tikeraarfigaa Aalborgillu borgmesterianik Henning G. Jensenimit angusaqarfiulluartumik ataatsimeeqateqarsimalluni. Marluullutik isumaqatigiissutigaat pisortatigoortumik naalakkersuinikkut suleqatigiilerniarlutik. Siullermik Namminersornerullutik Oqartussat aamma Aalborgip kommuniata ilinniartitaanerup, inuussutissarsiornerup, isumaginninnerup kingusinnerusukkullu peqqinnissaqarnerup tungaatigut qaninnerusumik suleqatigiilerniarlutik misilinniarpaat.
Tikeraarnerup nalaani Naalakkersuisunut siulittaasuata Nordjyllands Erhvervsakademi pulaarpaa. Akademi Kalaallit Nunaanni ilinniarfinnut pisortatigoortuunngitsumik arlalinnik isumaqatigiissuteqarpoq, taakkununnga ilanngullugit niuernermik ilinniarfik aamma sanaartornermik saviminilernerinermillu ilinniarfiit. Aalborgip kommunianut aaqqissuussamik suleqatigiilerniarneq pissuteqarpoq Naalakkersuisut siulittaasuata kissaatigimmagu isumaqatigiissutit tamakku pisortatigoortumik isumaqatigiissummut ilanngutsinneqarsinnaanerat.
Naalakkersuisut siulittaasuatta aamma pulaarpaa inuussutissarsiutinik aallarnisaaniartut suliffeqarfiat Dreamhouse, tassani namminersortunut nutaanut init ilisimasallu atugassanngortinneqartarput. Nuup Kommuneanut nutaamik suleqatigiinnissamik isumaqatigiissutikkoortumik Aalborgip kommunea aallarnisaaniartumut Nuummeersumit inissaqartitsivoq. Naalakkersuisut siulittaasuata nuannaarutigaa tusassallugu, aallarnisaaniartup kalaallip periarfissani taakkunani isummani misilittarsinnaammagit neriuutigalugulu aallarnisaaniartup utersimaleruni isumassarsiani nalinginnaasumik atorsinnaassagai.
Annertunerusunik paasisaqarusukkuit Namminersornerullutik Oqartussani Naalakkersuisut Allattoqarfiani oqarasuaat 35 50 00mi Naalakkersuisut siulittaasuat Hans Enoksen attaveqarfigiuk.