OLT-imut siulittaasuuffik Kalaallit Nunaata tiguvaa

Naalakkersuisut Siulittaasuata Kuupik Kleistip Montserrats-ip Naalakkersuisuisa siulittaasuanit Reuben Meade-mit siulittaasuuffigineqarsimasoq siulittaasuuffigilerpaa. Taamaalilluni Kalaallit Nunaata inuit 2,5 millionit imarpissuit pingasut tassaasut Manerassuaq, Indiap imarpia Atlantikulu 2012-imi siuttuuffigissavai. Tassunga tunngatillugu OLT-EU ataatsimiinnissamut Ministerillu ataatsimiinnissaannut nunatsinnit aaqqissuunneqartussamut Kalaallit Nunaat inunnut 100-t missaanniittunut qaaqqusisuussaaq EU-mi nunat ilaasortaasut sisamat, OLT-mi ilaasortat aallartitaat, EU-kommissioni, EU Kommisærit Ministerillu 2012-mi Kalaallit Nunaannut ataatsimiigiarlutik tikissapput.

Danskit Naalakkersuisuisa Nunanut allanut Ministeriat Villy Søvndal Danmark-ip aammalu EU-mi Danmarkip siulittaasuunerata aallartitaatut OLT-EU suleqatigiiffiani ataatsimiinnermut peqataavoq. Tamanna oqaluttuarisaanermut ilannguppoq siullerpaamik danskit ministerianit OLT-EU suleqatigiiffiani ataatsimiinnermi peqataaffigineqarmat, tamatumalu takutippaa Danmarkip tungaanit Kalaallit Nunaat OLT-lu pingaartinneqarnerat.

Ministerit ataatsimiinneranni Kuupik Kleistip oqalugiarnermini pingaartillugu oqaatigaa OLT pillugu saqqumilaartuunissaq qanoq pisariaqartiginersoq tamannalu Kalaallit Nunaata siulittaasuunerani salliutinneqarumaartoq. Naalakkersuisut Siulittaasuata aamma ersarissarpaa suli avatangiiseq silaannaallu allanngoriartornera kiisalu aningaasarsiornikkut ineriartortitsinissaq eqqumaffigissallugu pisariaqartoq ilisimatitsissutigalugulu Kalaallit Nunaat siulittaasuunermini minguinnerusumik tunngaveqarluni ineriartortitsineq qulequtaralugu sulinissani pilersaarutigalugu. OLT-mi ilinniartitaaneq, inerisaaneq ilisimatusarnerlu Kalaallit Nunaata siulittaasuunermini pingaartillugu suliuniutigineqarnissaat oqaatigaa oqariartaaseq una ilisarnaatitut atorlugu: "How Cool is Green? - Discover it in Greenland 2012." - " Kingunissalimmik ineriartortitsineq - Kalaalit Nunaanni 2012-mi paasiniaruk”.

Ukiumoortumik OLT-mi naapeqatigiittarneq pisarpoq qulakkeerniarlugu ataavartumik OLT ministerit EU Kommissionillu akornanni oqallittarnerup ingerlanneqartarnissaa. Tamatuma qulakkiissammagu nunat OLT-p ataaniittut pisinnaatitaaffiisa periarfissaasalu nukittorsarneqarnissaat EU-mi suleqatigiinneq tamakkiisumik atorlugu.

Nunat OLT-p ataaniittut 2014-imi atuutilertussamik isumaqatiginninniaqqileruttorput. Taamaattumik aamma ukioq manna OLT-EU-p ataatsimiinnerani oqaluuserisassaaniippoq OLT-t EU-llu siunissami atassuteqaqatigiinnermut tunngasoq. Siunissami EU-mut atassuteqarnermut tunngasumik oqaluuserisaqarnerup saniatigut OLT-p 2012-imi pingaartitaanut tunngasut OLT-mi ministeriisa OLT-p Kattuffiata politikkikkut aalajangersakkat aalajangiiffigivaat. Kuupik Kleist siulittaasutut oqalugiaatini Kalaallit Nunaannit oqariartuutigineqartumik naggaserpaa: Suleqatitsinnik suleqateqarnitsinni politikkikkut saqqumilaarnissaq piumasaqaatiginiarparput. Saqqumilaarnikkut paasissutissiisarnerit amerlanerunerata sulianut piginnittooqataaneq ataatsimuussuseqarnerullu sakkortunerulerneranik kinguneqartussaammat. Tamanna periarfissaavoq anguniartariaqartoq.