Sullissivik.gl-ip tamanut atuutilernera

Ulloq januar-ip 27-at 2012 aallarnerfigalugu, kialuunniit apeqqutimi akissutissartaat nammineerluni nassaarisinnaalissavai, tassami Kalaallit Nunaat toqqaannartumik innuttaasunut nittartakkamik iserfissaqalissaaq – sullissivik.gl.

Sullissivik.gl tassaavoq pisortat ataatsimoorussamik nittartagaataat, aaqqissuussaanermik iluarsaaqqinnermit aallaaveqartoq. Tassani allaffissornerup pitsaanerusumik innuttaasunullu paasiuminarnerusumik ingerlatsiffiginissaanut malittarisassat taakkartorneqarput, taakkulu qulakkeertussaavaat, innuttaasut Kalaallit Nunaanni sumiluunniit najugaqaraluarunik pisortanullu sorlernulluunniit saaffiginnikkaluarunik, saaffiginninnerminni sullinneqarnermik pitsaassutsimigut qaffasissumik assigiimmik sullinneqartarnissaat.

Taamaaliornikkut kinaluunniit sullinneqarnermik ajornaannerusumik pissarsisinnaalissaaq, allaffeqarfinnut ataasiinnarmik iserfissaqalissaaq, sullinneqarnermik imminut atanerusumik periarfissaqalissaaq kiisalu internet aqqutigalugu ilisimasanik paasissutissanillu ajornannginnerusumik pissarsisinnaalissalluni.

Kalaallit Nunaanni Namminersorlutik Oqartussat kommunillu aaqqissuussaanermik iluarsaaqqinneq januar-ip aallaqqaataanni 2009-mi atuuttunngortippaat. Taamaalilluni sullissivik.gl-imut takorluugaq aamma naqissuserneqarpoq Kalaallit Nunaatalu innuttaasunut nittartagaata inerisarneqarnera aallartinneqarluni.

Imminut sullinneq aamma inuttut sullinneq.

Sullissivik.gl tassaavoq toqqaannartumik attaveqaatitigoortumik innuttaasunut nittartagaq, tassani Namminersorlutik Oqartussanit kommuniniillu innuttaasunut soqutiginaateqartumik paasissutissat ataatsimut katersorniarneqarput. Sullissivik.gl-imi ilitsersuutit paasiuminartut, eqqortut tamakkiisuusullu, immersuiffissat assigiinngitsut, inatsisit atuuttut kiisalu attaveqarnissamut paasissutissat nittartakkallu ajornaatsumik sukkasuumillu pissarsiarisinnaavatit. Taamaammat sullissivik.gl-ip pisortanut apeqqutit sukkasuumik qulaajaaffiginissaat ajornannginnerulersissavaa.

Sullissivik.gl-imik atuiniaraanni taamaallaat qarasaasiamik imaluunniit oqarasuaammik angallattakkamik internet-imut attavilimmik peqarnissaq piumasaqaataavoq. www.sullissivik.gl iserfigiinnassavat, aallartillutillu.

Illit najukkanni innuttaasunik sullissivimmit imaluunniit nunaqarfimmi allaffimmit inuttut sullinneqartarnerit sullissivik.gl-ip taarsernavianngilaa. Paarlattuanik, inuttut innuttaasunik sullissineq nittartakkamit taperserneqarlunilu ilalersorneqartartussaavoq, tassa sullissinermik suleqataasut tamakkerlutik nittartakkamut isersinnaapput nittartagarlu ujarlerfittut atorsinnaallugu. Taamaaliornikkut sullinneqarnermik assigiiaartumik sumilu najugaqarnerit apeqqutaatinnagu sukkasuumik akissutisinissat qulakkeerneqassaaq – aamma illit nammineerlutit internet-imut attaveqanngikkaluaruilluunniit.

Sullissinermik suleqataasut sullissivik.gl-imik atuinissamik sungiussisimasuugamik, sullissivik.gl-imik illit atuilernissat ajornartorsiutigigukku, aamma taakku ikiorsinnaavaatsit.

Siunissami qinnuteqaatit sullissivik.gl-imit toqqaannartumik aamma nassiunnissaat periarfissaalerumaarpoq. Tamatumanili Nem-ID-mik (atsiorneq digital-iusoq) atuisinnaaneq piumasaqaataavoq, illit nammineq assannik atsiorninnut taartaasinnaasoq. Kalaallit Nunaanni Nem-ID-mik atuilernissap tungaanut, immersugassat tamakkerlutik suli naqiterneqarlutillu assammik atsiorneqartarallassapput.