Kuupiup tusagassiortut nunanit allaneersut naapippai

Naalakkersuisut Siulittaasuata Kuupik Kleistip ullumi ilanngutassiortorpassuit ilaat Københavnimiittut naapippai. Naapitsineq pivoq International Press Centremi, tassani poliitikerit kulturimillu sammisallit nuimasut naapinneqarsinnaakkajuttarput.

Kuupik Kleisti siorna aasakkut naalakkersuisooqatigiit pilersinneqarneranniilli Naalakkersuisut politikkiat pillugu nassuiaateqarpoq. Kuupik Kleistip siulliullugu eqqartorpaa siorna juunip 21-ani namminersornerup, ilaatigut Kalaallit Nunaata namminiilivinnissaanik periarfissiisup, eqqunneqarnera. Kuupik Kleistip periarfissap taassuma ukiorpassuarni siullerni atorneqarnissaa takusinnaanngilaa erseqqissarlugulu, qanorluunniit pisoqassangaluarpat inuttaasut taasitinneqartariaqartut.

Kuupik Kleistip nassuerutigaa, Kalaallit Nunaat nunarsuarmi nunat allat assingalugit aningaasaqarnikkut ajornartorsiornermik unammillerneqarmat. Taamaattumik aamma 2011-mut Aningaasanut Inatsisissatut siunnersuut allaffissornikkut sipaarniuteqarnissamik imaqarpoq, kisianni Naalakkersuisut pingaarnertut suliniuteqarfigisaat; ilinniartitaaneq, meeqqat inuusuttullu sipaarniarfigineqanngillat. Erngup nukinganik nukissiutinut aningaasaliissutit ingerlaannassapput, naallu aningaasarpassuit atorneqaraluartut siunissaq ungasinnerusoq isigalugu aningaasaliissutit annertuumik sipaarutaassapput. Aningaasaliissutitigut ukiualunnguit ingerlanerini kallerup inneranik atuinerup 70 %-ia erngup nukinganik pilersorneqarnerminngaanniissaaq.

Inuussitissarsiortit pingaarnersaat aalisarneq mianernartumik inissisimavoq, tamanna pisuussutinut uumassusilinnut nunarsuarmilu niuerfinni akinut peqquteqarpoq. Taamaattumik Naalakkersuisut inuussutissarsiutit allat, soorlu takornariaqarneq, uuliamik aatsitassanillu tunissassiorneq annertuumik salliutippaat. Kuupik Kleistip Cairnip Qeqertarsuup sioraani uuliasiorluni/gassisiorluni qillerinermi uuliaqarneranik/gasseqarneranik takussutissarsisimaneranik nutaarsiassaq nuannaarutigaa, kisianni Kuupik Kleistip eqqaasitsissutigaa, qalluisoqalersinnagu suli arlalinnik qillerisoqartariaqarlunilu misissueqqissaartoqartariaqartoq.

Kuupik Kleistip erseqqissaatigaa, silaannaap allanngoriartornerata kingunerisaanik umiarsuarnik nalinginnaasunik umiarsuarnillu takornariutinik angallanneq aamma unammillernartoqartoq, ullumikkoqqissaarlu ullup qeqqata siorna tamannaqqissaaq pil-lugu Christiansborgimi tusarniaanermi peqataasimanerarpoq. Tusarniaanermi Kuupik Kleistip Danmarkip Kalaallit Nunaatalu suleqatigiillutik Issittumut politikkiliornissaat, kii-salu Danmarkip Kalaallit Nunaatalu ataatsimoorlutik nunat tamalaat Issittumi annertune-rusumik upalungaarsimanissamik sillimaniarnermillu isumaqatigiissusiornissamik kaammattorneqarnissaat kaammattutigaa.

Ilanngutassiortut nunanit allaneersut soqutiginerpaasaasa ilagaat Qeqertarsuup sioraani uuliamik nassaarsimagunarneq Greenpeaceillu piffimmi pineqartumiinnera.

Kuupik Kleistip eqqaavaa, Kalaallit Nunaanni uuliasiornissamik akuersissutinik tunnius-sinermi avatangiisinut sillimaniarnermullu piumasaqaatit qaffasinnerpaat piumasaqaa-taammata - piumasaqaatit Nordsømi piumasaqaatitut qaffisitsigisut, ilami immaqa taak-kunanngaanniilluunniit qaffasinnerit. Tamanna pillugu Kuupik Kleistip Greenpeaceip uuliasiornerup avatangiisinik mianerinnilluni ingerlanneqarnissaanik isumaa isumaqati-gaa. Taamaattorli Kuupik Kleistip Greenpeaceip Kalaallit Nunaanni uuliasiornermik unitsitsiniarnera isumaqatiginngilaa, Kuupik Kleistillu isumaa naapertorlugu Kalaallit Nu-naat tassaavoq Issittumi uuliasiorfigissallugu isumannaannerpaaq.

Kuupik Kleisti siunissami nunat tamalaat Issittumi annertunerusumik upalungaarsimane-rup sillimaniarnerullu tungaasigut sukkut suleqatigineqarsinnaanerat pillugu aperineqa-rami oqarpoq, ingammik Canadap, Norgep Ruslandillu tungaannit Issittumut (Qalaser-suarmut) soqutiginninneq annertoorujussuusoq, Danmarkillu ingammik Issittumi ilisima-tusarnermi sakkutooqarnikkullu ukiuni kingullerni siuttutut inissisimanini annaasimam-magu ugguarutigalugu.