Naalakkersuisut Greenpeace-p Kalaallit Nunaanut iliuusai tapersinngilluinnarpaat

Naalakkersuisut ullaarmanna paasivaat Greenpeace-kkormiut Cairn Energy-p uuliasiorluni qillerivianut Stena Don-imut sillimaniarnermut killissarititaasoq qaangersimagaat. Naalakkersuisut ilanngullugu ilisimatinneqarput Greenpeace-kkormiut qillerivimmut qallorsimasut. Iliuutsit taama ittut avaqqunneqarsinnaanngitsumik inatsisinik unioqqutitsinerupput aammalu demokratiskiusumik ingerlatsinermi tunngaviusunik unioqqutitsinerupput. Aamma Greenpeace-kkormiut iliuusaat sillimaniarnermi malittarisassanik imaannaanngitsumik unioqqutitsinerupput, malittarisassammi inuit inuunerat avatangiisillu mianerineqarnissaat anguniarlugit suliaapput.

- Qillerinerit maanna unitsinneqarput, taamaalilluni Greenpeace-kkormiut aammaarlutik iluatsitseqqipput Kalaallit Nunaanni innuttaasut inuuniarnerminnut atatillugu aningaasarsiorsinnaanerannik kigaallassaassallutik, Naalakkersuisut Siulittaasuat Kuupik Kleist oqarpoq, nangillunilu.

- Naalakkersuisut Greenpeace-kkormiut iliuuseqarnerat Kalaallit Nunaata namminermi Naalakkersuinikkut ingerlatsisinnaaneranik pisinnaatitaaffiinik sakkortuumik innarliiniarnertut akornusersuinertullu isigaat. Isumakulunnartorujussuuvoq Greenpeace-kkormiut suna tamaat atorlugu tusagassiuutinit malugineqarnissartik anguniarlugu inuit inuunerannik avatangiisillu mianerineqarnissaannik malittarisassat unioqqutiinnarlugit iliuuseqarmata. Taama inatsisinik unioqqutitsinerat akuersaarneqarsinnaanngilluinnarpoq, peqatigitillugu oqaatigisariaqarparput tatigilluinnaratsigu politiit oqartussaasullu allat qularnaassaqqaarmassuk inatsisit naapertorlugit inuussutissarsiutitigut ingerlatsiniarnerit akornusersorneqaratik ingerlasinnaanissaat qularnaassagaat, Naalakkersuisut Siulittaasuat Kuupik Kleist nangillunilu.

- Uuliasiorluni qilleruteqarfinni peqqissaarussamik nakkutilliisarnerni uppernarsillugu paasineqarpoq Cairn-ikkormiut Kalaallit Nunaanni uuliasiorlutik qillerinitik sillimaniarnermut malittarisassat sukannernerpaat naapertorlugit ingerlakkaat aammalu pisortanit malinneqaqqusaasut tamaasa unneqqarilluni malinneqartut. Taamaattumik Naalakkersuisut Cairn-ip Kalaallit Nunaanni suliaannut tatiginnilluinnarput, Kuupik Kleist naggasiivoq.