Naalakkersuisoqarfimmi pisortartaaq

Naalakkersuisut ataatsimiinnerminni Naliliisarnermut Ataatsimiititaliap inassuteqaataa malillugu aalajangerpaat, naalakkersuisoqarfimmi pisortamik atorfinitsitsiniarlutik.

5. marts 2010 aallarnerfigalugu Inuussutissarsiornermut Sulisoqarnermullu Naalakkersuisoqarfimmi pisortatut Christel Lund Jæger-Hansen atorfinitsinneqarpoq.

31-nik ukiulik Christel Lund Jæger-Hansen DTU-mi 2005-imi civilingeniøritut suliamik teknologiimut tunngasumik aqutsinermut immikkut ittumik ilinniagaqartutut soraarummeersimasuuvoq. 2005-imiit 2006-imut ilisimatusarnermi ikiortitut DTU atorfeqareerluni 2006-imi maajip qaammataani fuldmægtigitut atorfeqarsimavoq. Kingorna allaffiup pisortaatut sulereerluni maannakkut tassa Inuussutissarsiornermut Sulisoqarnermullu Naalakkersuisoqarfimmi pisortatut atorfinitsinneqarpoq. Christel Lund Jæger-Hansenip ilinniarnini assigiinngitsutigut pikkorissartarnermigut qaffassartarsimavaa ukiullu ataatsip matuma siorna aqutsinermik piukkunnaatini annertusarniarlugit MBA-mik ilinniarnini aallartissimallugu.