Kalaallit Nunaata silap pissusaanut tunngatillugu iliuusissatut angorusutai piareerput

Allakkami Naalakkersuisut Siulittaasuata Kuupik Kleist-ip erseqqissaatigivaa nunarsuarmiut silap pissusaa pillugu isumaqatigiissutissaannut, qaammammi matumani København-imi Naalagaaffiit Peqatigiit ataatsimeersuartitsineranni naammassillugu isumaqatiginninniutigineqartussatut ilimagineqartumut, Kalaallit Nunaat sapinngisamik peqataarusuttoq.

- Qularutigineqassanngilaq Kalaallit Nunaat ukiuni 2013-imiit 2020-p tungaanut gassinik silaannarmik kissatsitsiartortartunik silaannarsuarmut aniatitsinerminik annikillisaaniarmat. Nunarsuarmioqatigiit tamarmik akisussaaffeqarput silaannaap kissatsikkiartornera akiorniarlugu gassinik silaannarmut aniatitsinerminnik annikillisaanissamut. Kisiannili isumaqarpugut taamatut annikillisaanissamik akisussaaffeqarneq nunat ataasiakkaat inuaqatigiittu aningaasarsiornikkullu kiffiffiannut naleqqussarneqartariaqartoq, Naalakkersuisut Siulittaasuat Kuupik Kleist oqarpoq.

Taamaattumik Kalaallit Nunaata annikillisaanissamik akisussaaffini immikkoortunut pingasunngorlugit agguarpai. Siulleq inuiaqatigiinni innuttaasut inissisimanerat eqqarsaatigalugu siunertat, alla aatsitassarsiornikkut uuliasiornikkullu killiffik isiginiarlugu siunertat kiisalu aamma nukimmik annertuumik atuilluni suliffissuaqarnernik pilersitsissagaanni siunnerfiusussat.

Inuiaqatigiittut siunnerfissat eqqarsaatigalugit inuiaqatigiit kalaallit ukiuni 2013-imiit 2020 tikillugu gassinik kissatsikkiartortitsisartunik aniatitsinertik 2007-imi tamakkiisumik aniatitanut naleqqiullugu 5 %-imik annikillissaassapput. Tamanna Kalaallit Nunaata anguniarpaa pingaartumik erngup nukinga atorlugu nukissiuuteqarnerup annertusarneragut, inissialiortitsinerit pitsanngorsaaviginerisigut, aalisarnermik inuussutissarsiuteqarnerup sukateriffigineragut, kiammik pilersinneqartartumik atuilluarnikkut, soorlu ikuallaaviit eqqarsaatigalugit aammalu inuiaqatigiittut pissusilersuutigineqartartut nukimmik atuilluarnerunissamut saatinnerisigut. Taamaalilluni Kalaallit Nunaata innaallagissamik pilersorneqarnerata 60 %-ia erngup nukinganeersuunissaa piffissami 2013-imiit 2020-p tungaanut anguniarneqassaaq.

- Erseqqissaatigissavarputtaaq Kalaallit Nunaat nunatut Namminersuleqqammersutut aningaasarsiornikkut ineriartorsinnaanissamik tunngaviusumik  pisariaqartitsilluinnarmat. Nassuerutigisariaqarparput Kalallit Nunaat aningaasarsiornikkut imminut nappassinnaanerulissappat suliffissuaqarnikkut ineriartortitsinissaq avaqqunneqarsinnaanngimmat.
Taamaammat aatsitassarsiornermi, uuliasiornermi kiisalu nukimmik annertuumik atuilluni suliffissuarnik nutaanik ingerlatsinermi, soorlu alumiiniumik aatsitsivimmik, gassinik kissatsikkiartortitsisartunik aniatitsinnginnerunissamik piffissami 2013-imiit 2020-p tungaanut Kalaallit Nunaata pisussaaffilersorneqannginnissaa kissaatigaarput, Naalakkersuisut Siulittaasuat Kuupik Kleist oqarpoq.

Suliffissuaqarnikkullu ingerlakkusunneqartut siuliani taakkartorneqartut nunarsuarmi maleruaqqusat tunngavissiissutigineqartullu piumasaqaateqarnerpaat naapertorlugit ingerlanneqarnissaat Kalaallit Nunaata qulakkiissavaa, matumani teknikkikkut periutsit pitsaanerpaat avatangiisillu illersorneqarnissaats qulakkeerniarlugu malitassat sukannernerpaat malinniarneqarlutik.