Silap pissusaa pillugu anguniagassat paaseqatigiissutigineqarput

Kalaallit Nunaat Danmarkilu nunarsuaq tamakkerlugu isumaqatigiissutissamut oqaasertaliussassatut ilanngunneqartussanik sisamanngormat isumaqatigiissuteqarput, tassani Kalaallit Nunaata silap pissusaa pillugu anguniagassai erseqqissaatigineqarlutik. Silap pissusaa pillugu nunarsuaq tamakkerlugu isumaqatiginninniarnerit ingerlasimanerat peqqutaalluni kalaallinit oqaasertaliunneqartussatut ilanngutitinneqarusukkaluartut ingerlariaqqinnermi iluatsinneqanngitsoorput. Taamaakkaluartoq Kalaallit Nunaata anguaa nunatta silap pissusaa pillugu anguniagaanik paasinnitsitsilluni. Danmarkip akuersaarpaa Kalaallit Nunaat EU-mut ilaasortaanngitsutut Danmarkitullu silap pissusaa pillugu anguniagaqartussatut pisussaaffilerneqarsinnaanngimmat. Peqatigitillugu Danmarkip akuersaarpaa Kalaallit Nunaat namminerisaminik silap pissusaa pillugu anguniagaqarmat.

- Iluarisimaartorujussuuara Danmarkip silap pissusaa pillugu immikkut politikkeqarnerput akuersaarmagu. Silap pissusaa pillugu politikki Kalaallit Nunaata siunissami ineriartoqqissinnaanissaanut aalajangiisuulluinnarpoq. Nuannaarutigisorujussuuara Danmarkip Namminersorneq pillugu inatsisip anersaava paasilluarsimammagu, tassa Kalaallit Nunaata annerujartortumik imminut nappassinnaanissaminut aningaasarsiorsinnaanissaa. Maannakkut paaseqatigiissutigineqarpoq Kalaallit Nunaata silap pissusaa pillugu politikkia aammalu aningaasarsiornikkut ineriartoqqissinnaanissamik periarfissai oqimaaqatigiittariaqarmata. Nuannaarutigaarattaaq Danmarkip Nalagaaffiit Peqatigiit silap pissusaa pillugu sinaakkutissiisumik isumaqatigiissutaata oqariartuutaa akuersaarmagu, tassa nunarsuarmi silap pissusaa tamatta akisussaaqatigiiffigigatsigu, kisiannili assigiinngisitaartumik aallaaveqarnerput ataqqineqartariaqartoq, Kuupik Kleist oqaaseqarpoq.

Kalaallit Nunaata silap pissusaa pillugu politikkia immikkoortunut agguarneqarpoq, tassa inuiaqatigiit nalinnginnaasumik atuinermikkut gassinik kissatsikkiartuutaasunik aniatitsinerminnik annikillisaanissaannik siunnerfik, nukimmik ataavartumik pilersuinerup annertusarnissaa, aatsitassarsiornermi uuliasiornermilu kiisalu nukimmik annertuumik atuilluni suliffissuaqarnermik ingerlatsiniarnermi inissisimaffiup erseqqissaatigineqarnera.

Kalaalllit Nunaata aamma anguniarpaa nukimmik ataavartumik nukissiornerup siunnerfeqarluartumik 2013-imiit 2020-p tungaanut annertusarneqarnissaa. Matumani Kalallit Nunaata erngup nukinga atorlugu inuiaqatigiit nalinginnaasumik innaallagissamik pilersorneqarnerat 2020-mi 60 %-imik appasinnerpaaffeqassasoq anguniagaalluni.

Kalaallit Nunaat aatsitassarsiornikkut kiisalu uuliasiornikkut ukiuni kingulliunerusuni soqutiginartinneqartorujussuanngornikuuvoq aammalu erngup nukinga atorlugu alumiiniumik aatsitsiviliorsinnaanissaq eqqarsaataalluni. Tamaannera peqqutaalluni aatsitassarsiorfiit nutaat ukiuni aggersuni ammarneqarnissaat pilersaarutaavoq, soorlu aamma aatsitsiviliorsinnaanissaq eqqarsaataasoq. Aamma uuliasiorfiutileqatigiiffiit Kalaallit Nunaata imartaani uuliamik ujarlerlutik qillerinissaat pilersaarutaavoq.

Kalaallit Nunaat pisussaaffilerpoq suliffeqarfiit taama ittut pilersinneqassagaluarpata nunarsuarmi tamarmi malitassiissutit naapertorlugit pilersinneqartassasut, matumani atortut pitsaanerpaat (BAT - Best Available Techniques) atorneqarnissaat aammalu avatangiisit mianerineqarnissaat qulakkeerniarlugu malitassiissutit naapertorlugit (BEP - Best Environmental Practices) ingerlatsisoqarnissaanik pisussaaffilerluni.