Nuannaarnerup qullii kuupput

- Oqaluttuarisaaneq kingumut qiviarutsigu aatsaavissuaq aperineqarpugut. Nunarsuarmi inuiassuit allat assigalugit inuiannut naligiissinneqartussanngoratta attortisimanaqaaq. Ullumi ullormi oqaluttuarisaanitsinni pingaaruteqartumi Namminersornerup inuiannit kalaallinit akuerineqarnerani siulivut ilunnguummernartumik qamaniiteqaakka. Taakkua anersaavat imaannaanngitsoq uummammioralugu killitsisimangaarlunga nuannaarnerup pianik qulliikka kuupput, Naalakkersuisut siulittaasuat Hans Enoksen Namminersornerup inuiannit kalaallinit akuersissutigineqarnerata pisortatigoortumik nalunaarutigineqarneranut atatillugu attortissimaqaluni oqaaseqarpoq.

- Imminut oqartussaaffiginerunissaq angeratsigu immitsinnut pisussaaffilerpugut suli anginerusumik akisussaassusermik peqaqqulluta. Piffissanngorpoq inuiattut qiimmassaqatigiilluta, tapersersoqatigiilluta aammalu nukittorsaqatigiittarluta ingerlariaqqissalluta. Inuusuttunaa, inuiassuarnut allanut naligiissinneqaratta periarfissasi ammaanneqarput. Akisussaaffik isaanneqartoq tigusiuk nunatsinnullu angusassaq pitsaanerpaaq anguniarlugu suleqatigiitta. Namminersornerup akuerineqarnerata takutippaa ataatsimooraanni angusassaq anginerpaajusartoq, tassami kiffaanngissusermik piumasaqarneq qaquguluunniit noqinneqarsinnaanngilaq, Hans Enoksen nangilluni oqaaseqarpoq.

- Ullumi pingaarutilimmik angusaqarnitsinni nunarsuarmi sumiluunniit nunap inoqqaaqativut puigussanngilagut. Taakkua anguniagaqarneranni ullumi angusatsigut aqqutissiueqataarusuppugut, Hans Enoksen eqqaasitsivoq.

- Pinngitsoorumanngilangattaaq qamannga pisumik qujassuteqassallunga Kalaallit Nunaata Danmarkillu Naalakkersuisuinut, inatsisartuinut, politikerinut ataasiakkaanut minnerunngitsumillu atorfilittanut immikkullu ilisimasalinnut suliap matuma piviusunngortinneqarnissaanut mikinngitsumik suleqataasimanerannut. Naggataatigullu inuiaqatikka kalaallit qutsavigiumavakka nunaminnut upperinnillutik tatiginnillutillu alloriaqqikkusunnerannut. Siunissarput qaamavoq nunarput pillugu sulissaagut, Naalakkersuisut siulittaasuat Hans Enoksen naggasiilluni oqaaseqarpoq.