Ammassalik aningaasaqarnerminut akisussaavoq

Kommunit tamarmik aningaasaqarniarnikkut ingerlalluarnissaat Naalakkersuisunit kissaatigineqarpoq. Kommunalbestyrelsit borgmesterillu namminneq kommunini aalajangiisassasut aningaasaqarnerlu akisussaaffigigaat kommunalbestyrelsit, nunaqarfinni aqutsisut il.il. pillugit inatsimmi naqissuserneqarpoq. Taamatullu kommunit namminersortut ingerlassapput.

Ammassallip kommuniata aningaasaqarnera pitsaanngitsoq Naalakkersuisunit paasineqarmat erngertumik ikiuukkumallutik nalunaarput.

Naalakkersuisut aamma kommunep pisariaqartilluinnagaanik aningaasaqarneq pillugu siunnersuinermut ikiuupput. Ajornartorsiutit aaqqinniarlugit Naalakkersuisut siulittaasuat immikkut ittumik suliniuteqartoqarnissaanik pilersitsivoq, pingaartumik kommunemi meeqqanut inuusuttunullu sammisunik. Tassani Naalakkersuisut kr. 3,1 mio.-nik meeqqanut ilaqutariinnullu tunngasunut immikkoortitsipput.

Aamma imigassat 15 procentit sinnerlugit kimittussusillit tuniniarneqarnerat matuneqassasoq Naalakkersuisunit aalajangerneqarpoq. Naalakkersuisunit neriuutigineqarpoq immikkut suliniutit kingunerisaannik kommunip aningaasaqarnerata ukiup naannginnerani ilorrap tungaanut ingerlalernissaa, taassuma kingorna Ammassallip kommunea kommunerujussuarmut ilanngussammat.