Namminersorneq pillugu suliniutit sukkatsisarneqalerput

Isumaliutissiissummik tunniussinerup kingorna Inatsisartut upernaarmanna ataatsimiinnerisa nalaani Kalaallit Nunaanni Namminersornerup atuutitinneqalernissaa anguniarlugu innuttaasunik 25. november 2008 taasititsinissamut inatsisissatut siunnersuut suliarineqassaaq. Peqatigitillugu Naalakkersuisut siulittaasuata Hans Enoksen-ip Namminersorneq pillugu paasititsiniaarnerup pisortatigoortumik aallartinneqarnera nalunaarutigissavaa.

Namminersorneq pillugu Tusagassiivimmiit qaammatikkaartumik raatiukkut aallakaatitassiat qaammat una aallarnerfigalugu taasititsinissap tungaanut tusarnaagassiarineqartassapput. Namminersorneq pillugu TV-kut aallakaatitassiat sisamat sulianerineqassapput augustimiit november-ip tungaanut qaammatikkaartumik aallakaatinneqartassallutik. TV-kut raatiukkullu takutitassiaaqqat tusarnaagassiaaqqallu suliarineqassapput, soorlu aamma quppersagaaqqat suliarineqartussat. Minnerunngitsumik sinerissami innuttaasunik ataatsimiititsisarnerit augustimiit aallartittumik ingerlanneqalissapput. Namminersornerusut Namminersorneq pillugu allaffeqarfianit innuttaasunik ataatsimiititsiniarluni angalaqattaarnissat pilersaarusiorneqaleruttorput, tamannalu partiit siuttui peqatigalugit ingerlanneqarpoq. Pilersaarutaavoq angalanerni taakkunani Isumalioqatigiissitami ilaasortaasimasunit ikinnerpaamik ataatsip ilaatinneqartarnissaa. Angalaqattaarluni ataatsimiititsisarnissat pilersaarusiorneqarnerisa aasanerani sulinngiffeqarnissaq sioqqullugu naammassineqarnissaa naatsorsuutigineqarpoq.

Namminersorneq pillugu Isumalioqatigiissitap suliai pillugit paasissutissat amerlasoorpassuit Namminersornerullutik Oqartussat nittartagaani www.nanoq.gl - imi nassaassaareerput.

Aamma Namminersorneq pillugu allaffeqarfiup ilinniarfeqarfinni assigiinngitsorpassuarni pingaartumik taaguutit Namminersornerulluni Oqartussaaneq, Namminersorneq Namminiilivinnerullu assigiinngissutaat paasititsiniutigisareerpaat.

Namminersorneq pillugu Isumaliutissiissutip eqikkarnera kiisalu Namminersorneq pillugu inatsisissatut siunnersuut aasaanerani sulinngiffeqareernerup kingorna illunut tamanut agguaanneqassaaq.

Inatsisartut ukiaanerani ataatsimiinnerminni Namminersorneq pillugu Isumalioqatigiissitap isumaliutissiissutaanik, nassuiaatitaanik kiisalu Namminersorneq pillugu oqallisiginnilluarnissaminnut periarfissaqassapput. Taava Namminersorneq pillugu innuttaasunik taasititsineq 25. november 2006 ingerlanneqassaaq, tamatuma kingorna Inatsisartut katersorteqqinneqassapput Namminersornerup Kalaallit Nunaanni eqqunneqarnissaa aalajangiiffiginiarlugu. Namminersornerup eqqunneqarnissaata pisortatigoortumik pinissaa 21.juni 2009 pilersaarutigineqarpoq.