Namminersorneq pillugu isumaliutissiissut pisortatigoortumik tunniunneqalerpoq

Isumalioqatiigiissitap siulittaasoqarfianiit siulittaasoq Jonathan Motzfeldt siulittaasullu tullia Christian Mejdahl isumaliutissiissummik Ministeriuneq Anders Fogh Rasmussen-imut Naalakkersuisullu Siulittaasuanut Hans Enoksen-imut tunniussissapput.

Taamaalilluni Isumalioqatigiissitap ukiut sisamat ingerlanerini suliaata inernera Statsministerimut Naalakkersuisullu Siulittaasuanut tunniunneqassaaq. Isumalioqatigiissitaq taamanikkut pilersinneqarami Danmarkimi Kalaallit Nunaannilu Naalakkersuisut toqqagaannik Folketingimiit Inatsisartuniillu innersuussutigineqartunik 16-inik ilaasortalerneqarpoq, tassa Danmark Kalaallit Nunaallu amerlaqatigiinnik inuttaliisuullutik. Kalaallit-Qallunaallu Namminersorneq pillugu Isumalioqatigiissutaanut suliassiissut naapertorlugu Isumalioqatigiissitap ilaatigut pingaarnerpaamik suliassaraa inatsisit inuiaat akornanni atuuttut tunngavigalugit inuiaat kalaallit imminnut oqartussaaffigisinnaanerat naapertorlugu inatsillu tunngaviusut periarfissiinerat naapertorlugu Kalaallit Nunaanni oqartussaasut oqartussaaffinnik allanik qanoq ilillutik tigusisinnaanerannik isumalioqatigiissitat isumaliutiginnissallutik siunnersuuteqassallutillu. Kiisalu aamma suliassaannut ilaavoq Namminersorneq pillugu inatsissamik siunnersuusiussallutik aamma suliassaqarfiit Kalaallit Nunaanni Namminersornerullutik Oqartussat pillugit inatsit naapertorlugu Kalaallit Nunaanni oqartussaasunit tiguneqareersut eqqarsaatigineqassallutittaaq. Ataatsimiititaliarsuarmut suliassiissut kiisalu isumaliutissiissut taassumalu eqikkarnera Namminersornerullutik Oqartussat nittartagaanni www.nanoq.gl atuarneqarsinnaalissapput.

Tunniussinermut atatillugu marlunngorpat malunnartitsinissaq kikkunnut tamanut ammassaaq kaffillernertaqartussaalluni. Persuarsiornartumik malunnartitsinerup nalaani Isumalioqatigiissitap siulittaasoqarfianit, Ministeriunermit Naalakkersuisullu Siulittaasuanit oqalugiarneqassaaq. Naalakkersuisut siulittaasuata Hans Enoksen-ip oqalugiaammini nalunaarutigissavaa Namminersorneq pillugu paasititsiniaaneq tunniussineq aallarnerfigalugu pisortatigoortumik aallarnerneqartoq.

Persuarsiornartumik malunnartitsineq qaangiutiinnartoq Isumalioqatigiissitat siulittaasoqarfianit, Ministeriunermit Naalakkersuisullu Siulittaasuanit peqataaffigineqartumik tusagassiortunik katersortitsisoqassaaq, tamatuma aqqarnup missaani aallartinnissaa naatsorsuutigineqarpoq.