Inatsiseqarnermut inatsisillu pillugit immikkoortortaqarfik

Nalinginnaasumik siunertaq:

Kalaallit nunaanni inatsisiliornerup pitsaassusaata qularnaarneqarnissaa siunertaralugu malittarisassanik atuutilersitsinernut atatillugu naalakkersuisoqarfiit ataasiakkaat inatsisinut tunngasutigut ikiornissaat Inatsiseqarnermut inatsisillu pillugit immikkoortortaqarfiup sullisissavai. Saniatigut inatsisitigut ajornartorsiutinut atatillugu immikkoortortaqarfik siunnersuisassaaq.

Inatsiseqarnermut Inatsisillu pillugit immikkoortortaqarfiup sulineranut tunngatillugu sammisaanut pingaarnernut makkua ilaapput:

- Inatsisit, peqqussutit nalunaarutillu pillugit inatsisitigut periutsit kiisalu aalisarnermut piniarnermut tunngasut iluanni kommunit ileqqoreqqusaat aamma qimmit qitsuillu pillugit ileqqoreqqusat

- Naalakkersuisunut Namminersorlutillu Oqartussat ingerlatsiveqarfiinut immikkoortortanut allanut il.il. inatsisit pillugit nassuiaassineq inatsisitigullu siunnersuineq

- Nalunaarutit kiisalu Namminersorlutik Oqartussat inatsisitigut najoqqutassaasa naqiterneqarneri tamanullu saqqummiunneqarneri

- Naalagaaffiup oqartussaasuinut attaveqarneq, matumani ilanngullugit ukununnga atatillugu:
Namminersorluni Oqartussaaneq pillugu aaqqissuussineq
Naalagaaffiup inatsisiliornera
Isumaqatigiissutinut atatillugu ataqatigiissaarisutut ingerlatsinerit

- Malittarisassanik atulersitsinerit aamma ukua pillugit ilitsersuineq.: 
Tamanut inatsisiliorneq aamma ingerlatsineq pillugu inatsisiliorneq
Inatsisartut Naalakkersuisullu pillugit inatsisiliorneq
Pisortanit arsaagaaneq taarsiivigineqarnertalik pillugu inatsisiliorneq
Aasaanerani nalunaaqutaq piffissamillu aalajangiinerit pillugit apeqqutit allat.

Aammattaaq suliassanut ataatsimut siunertalinnut suleqatigiissitaliani susassaqartunik assigiinngitsunit peqataaffigineqartunit assigisaannilu Inatsiseqarnermut Inatsisillu pillugit immikkoortortaqarfik suliaqartarpoq.

Aaqqissuussaanikkut inissisimaffik:

Inatsiseqarnermut Inatsisillu pillugit immikkoortortaqarfik Kalaallit Nunaanni Namminersorlutik Oqartussat qitiusumik inatsisinut immikkoortortaqarfigaat aaqqissuussaanikkullu Siulittaasup Naalakkersuisoqarfianiilluni.