Meeqqanik akiuussutissiisarnermi aaqqisuussineq nutaaq

Meeqqanik akiuussutissiisarnermi aaqqissuussineq nutaaq, tingulluummut hepatitis B-mut nappaatinullu ulorianaatilinnut tappiorannartunik pneumokokinik patsiseqartunut akiuussutissanik ilaqartoq, septembarip aallaqqaataani 2010 atuutilissaaq.

Nunatsinni Nakorsaaneqarfiup innersuussutaa meeqqanik akiuussutissiisarnermi aaqqissuussineq nutaaq, Inatsisartut 2009-p ukiaani ataatsimiinnerminni akuersissutigaat.

Tingulluut hepatitis B:

Tingulluut tunillaassuuttoq tappiorannartumik virusimik patsiseqartoq nunatsinni anner-tuumik atugaavoq, nappaateqalernerullu ersiutigeqqaagaasa saniatigut, tinguup qumarnera tingukkullu kræfteqalerneq kingunerluutaasinnaasarput. Tingulluutip allap kingunerluuteqartitsigajunnerusup hepatitis D-p, tingulluummut hepatitis B-mut akiuussutissinneqarnikkut pitsaaliorneqarsinnaasup, nunatsinni ukiuni kingullerni atugaalernera paasineqarportaaq.

Meeqqat sisamariarlutik - siullermik inunngorniariarpata tulliinilu pingasunik, tallimanik aqqaneq-marlunnillu qaammateqaleraangata akiuussutissinneqartassapput.

Akiuussutissinneqarnerup piaarnerpaamik sunniuteqarnissaa anguniarlugu aqqaneq-marlunnik ukiullit (atoqateqartalersinnagit) qaammatit arfinillit ingerlaneranni pingasoriarlugit akiuussutissinneqarnissaat aalajangiunneqarpoq. Aaqqissuussineq nutaaq malillugu meeqqat tingulluummut hepatitis B-mut akiuussutissinneqartut siulliit aqqaneq-marlunnik ukioqalernissaasa tungaanut tamanna ingerlanneqassaaq.

Tappiorannartut pneumokokkit:

Siullunnerup sulluaqqatigullu aseruuttoornerup saniatigut tappiorannartoq pneumokokki puakkut nuammik nipititsinermik, minnerunngitsumillu aakkut toqunartunittoornikkut qaratsallu ameraasaagut aseruuttoornikkut, anigugassaanngitsumik ajoquteqalernermik toqumilluunniit kinguneqartitsisinnaasarpoq. Akiuussutissaq tappiorannartut pneumokokkit assigiinngitsut 90-iusut ilaannut 13-nut Kalaallit Nunaanni nappaateqaler-sitsisartut 60 procentiinut illersuutaavoq.

Nappaatit tappiorannatunik pneumokokinik patsiseqartut, meeqqanut marluk inorlugit ukiulinnut navianaataat annertuneruvoq.

Meeqqat pingasoriarlutik, pingasunik, tallimainik aqqaneq-marlunnillu qaammateqarlutik akiuussutissinneqassapput. Meeqqat navianartorsiornerusinnaasut illersuutissinniarlugit septembarip aallaqqaataani marluk inorlugit ukiullit akiuussutissinneqarnissaannik aallaqqaammut neqeroortoqassaaq. (Meeqqat sisamaniit aqqanilinnut qaammatillit pingasoriarlutik akiuussutissinneqarnissamut neqeroorfigineqassapput aqqaneq-marlunniillu -23-nut qaammatillit marloriarlutik akiuussutissinneqarnissamut neqeroorfigineqassallutik).

Qulaani nutaanik akiuussutissiisalernissamik neqeroorutit saniatigut MFR-nut akiuussutissinneqartarneq (mæslingernermut-, savarnermut røde hunde-rnermullu akiuussutissat ataatsimoortut) aqqaneq-marlunniit ukiulinniit sisamanut ukiulinnut apparneqarpoq.

Meeqqanik akiuussutissiisarnermi aaqqisuussineq nutaaq pillugu naqitanngorlugit paasissutissanik saqqummiisoqassaaq, immikkullu sammineqassapput tingulluummut hepatitis B-mut tappiorannartunullu pneumokokinut akiuussutissinneqarneq.