Savalimmiormiut nunatsinni najugallit CTD-mut misissortissinnaalerput

Nappaammut kingornuttakkamut qaqutigoortumut CTD-mut (Carnitin Transporter De-fekt), savalimmiormiut akornanni atugaanerusumut, ukiualuillu ingerlaneranni Savalimmiuni arlalinnit toqussutaasumut, aaversinnikkut misissortinnissamut, Savalimmiormiut Kalaallit Nunaanni najugallit periarfissinneqarput.

Innuttaasut nappaateqarnerannik misissuisitsinissaq Savalimmiuni pisortat ammarmassuk, innuttaasut ilarpassui misissortipput, savalimmiormiullu Kalaallit Nunaanni najugallit assinganik peqqinnissaqarfimmit neqeroorfigineqarsinnaanngorput.

Pineqartut tassaapput Savalimmiormiut Kalaallit Nunaanni najugallit, 1985 sioqqullugu inunngortut, angajoqqaavilu illugiillutik savalimmiormiuusut. 1985–ip kingorna inunngor-tut, misissortissimanerminnillu nalornissuteqartut, peqqinnissaqarfimmut saaffiginnissapput. Statens Serum Institut-imi misissugassamik aaversinnikkut, CTD-mut misissortittoqartarpoq.

CTD(Carnitin Transporter Defekt)-mik nappaateqarnermi, timip orsoq atorlugu nukissamik pilersitsisarnera akornuserneqartarpoq (orsup arrorsimasup timimi atorneqarnera).

CTD-mik nappaatillit nalinginnaasumik nerisinnaallutillu imersinnaasut, sukkoq taamaaqataalu timiminni nukiliortorisinnaasarpaat. Inulli assersuutigalugu meriartarnermigut nerisaqarsinnaanngitsoq, timip sananeqaataasa minnerpaat (cellit) orsoq arrorsimasoq (fedtsyre) nukissatut atorsinnaanngimmagu, timip sulineranut nukissaminik amigaateqalersinnaavoq. Taamaattoqartillugu nukissamik atuinerpaat mianernarnerpaasullu tassaapput qarasaq, nukiit uummallu. Meeqqat assersuutigalugu nalinginnaasumik nappaalasoqartillugu meriartartut aamma/imaluunniit nerisaqanngitsut eqqortianerussapput. Nappaatip, pingaartumik uummatip nukinganut sunniuttumik ersiuteqarani, inersimasut akornanni atorneqarsinnaanera, ilisimaneqarpoq.

Carnitin-imik annertuumik aap akuata pissusissamisut annertussuseqalernissaa tikillugu, pisariunngitsumik nappaat nakorsarneqartarpoq. Meeqqat CTD-mik nappaatillit car-nitin-imik nakorsarneqarunik, meeqqatut peqqissutut allatulli inuusinnaassapput.