Nualluut pillugu Nunatsinni Nakorsaaneqarfiup naliliinera

Kalaallit Nunaanni nualluummik A(H1N1)-imik nappaatilimmik suli naammattoorsisoqanngilaq. Nunatsinni Nakorsaaneqarfiup naliliinera naapertorlugu piffissap sivisuup ingerlanerani nualluut A(H1N1) arlaleriarluni utersaartassaaq. Taamaammat Kalaallit Nunaanni nualluutip A(H1N1)-ip
ajornerpaaffigilersinnaasaa aallaavigalugu iliuusissat pillugit, Nunatsinni Nakorsaaneqarfik allakkiorpoq.

Nualluummik peruluuteqalersinnaasunut pinaveersaartitsinissaq nakorsaanissarlu suliniarnermi qitiutinneqassapput, kingunerluuteqalersinnaasunullu ilaanngikkaluarlutik kingunerlutitsisut, peqqinnissaqarfimmit sillimaffigineqassapput.

Peruluuteqalersinnaasut ukuupput pualluuteqartut, astmaqartut, taqqamikkut uummammikkullu nappaatillit, sukkortut kiisalu nappaatinut akiuussinnaassutsikkut akornutillit. Naartusut meeqqallu 2 inorlugit ukiullit aamma peruluuteqalersinnaasunut ilaapput.

Tunillatsittut amerlanerpaartaasa peruluuteqarsinnaasuttaaq amerlanersaasa nappaat sakkukitsumik sapaatip akunnera inorlugu immikkut nakorsartariaqanngitsumik atorumaaraat, Nunatsinni Nakorsaaneqarfiup naatsorsuutigaa.

Ullut 3-niit 5-inut nualloreerluni nappaatip ersiutai ajornerulerpata anernikilliornermillu nassataqarpat piarnerpaamik nakorsiarnissaq pisariaqarpoq Nunatsinni Nakorsaaneqarfiup siunnersuutigaa.

Imminut illersornissaq allanillu tunillaanaveersaarnissaq pillugit, Peqqissutsimut Naalakkersuisoqarfiup Nunatsinnilu Nakorsaaneqarfiup nivinngagassanngorlugu paasissutissiissutaa siunnersuutinik pitsaasunik imalik, qarasaasiakkut naqitanngorlugu anillatsillugu, pisortat allallu suliffeqarfiini atuarfinnilu kikkunnit tamanit nivinngaassorneqarsinnaavoq.

Nivinngagassiaq Nunatsinnilu Nakorsaaneqarfiup nappaalanersuaqarneranut tunngatillugu killiffik pillugit allakkiaa, Nunatsinni Nakorsaaneqarfiup nittartagaa www.nanoq.gl/nun peqqinnissaqarfiullu nittartagaa www.peqqik.gl aqqutigalugit pissarsiarineqarsinnaapput.