Apeqqutit akissutillu

Influenza A (H1N1)v sunaana?

Influenza A (H1N1)v tassaavoq virusi puukunit pinngortoq maannalu inunnit nappaatigineqalersoq. Nualluut puulukinit pisoq timmissani nujuartani, uumasuutini inunnilu nappaataalersarpoq, uumasoqatigiilli akornanni tunillaassuuttarneq qaqutigoortuulluni.

Influenza A (H1N1)v-p ersiutai suuppat?

Ersiutaasartut ukiup ilaani nalinginnaasumik nualluutinut assingusuupput tassanngaannaq kissarneqalersarnerullutik, toqqusaatigut ippigusunnerullutik, quersornerullutik, ujallerinerullutik niaqorlunnerusarlutillu. Timmittarneq aamma pisarsinnaavoq.

Influenza A (H1N1)v qanoq tunillaattarpa?

Nualluutip virusia silaannakkut inummiit inummut qanimut attaveqartarnikkut tunillaassuuttarpoq, assersuutigalugu quersornermi qisikkut tangajornikkullu. Tamatumani aamma attuuasarneq aamma pineqarsinnaavoq, tamatumani virusi anersaartuutini qisikkut assatsigullu isinut sorlukkulluunniit siaruaattarluni. Qaani mingutserneqarsimasuni toqqaannanngikkaluartumik tunillaassuuttarneq pisarsinnaavoq, tamannali qularnaarlugu ilisimasaqarfigineqanngilaq.

Qanoq iliornikkut tunillatsinnaveersaartoqarsinnaava?

Inuit nappaatillit attaviginaveersaakkit.
Napparsimaguit suliartoqinak, atuarfiliarnak assigisaannulluunniit. Assannut toqqaannartumik quersornaveersaarit tangajornaveersaarlutillu. Tallitit assiaqutigisakkit allarutissialluunniit ataasiartakkat atortakkit. Pingaartuuvoq assaat qaqorsaaserluni asakulasarnissaat, pingaartumik quersortaruit tangajortaruilluunniit. Tamatuma allat tunillatsinnissaat illillu tunillatsinnissat annikillisittarpaa.

Tunillatsinnissamut qanermut assiaqutit iluaqutaappat?

Inunnit sanioqquttuniit tunillatsinnissamut qanermut assiaqutit illersuutaasinnaanerat pillugu misissuisoqarsimanngilaq. Peqqinnissaqarfimmi sulisorisat inunnik tunillatsissinnaasutut pasineqartunik misissuisartut inuttut illersuuteqartariaqarput, taamatuttaaq qanermut assiaqutinik qanermulluunniit annoraamerngit assiaqutissiat. Inuit tunillanneqarsimasutut pasitsaassat allanut tunillaanaveersaarnissamut annoraaminernik qanermut assiaquteqartariaqarput.

Nualluut nutaaq qanoq sivisutigisumik tunillaasinnaava?

Inuit nualluuteqalersimasut ulloq ataaseq sioqqullugu nappaammut ersiuteqalersarput nappaatillu pilernera ullut arfineq-marluk ingerlaneranni pilersarluni. Meeqqat, pingaartumik naalungiarsuit, sivisunerusumik allanut tunillaasinnaasarput.

Tunillatsinnerup nappaatillu malunnarsinerata piffissartaa qanoq sivisutigisarpa?

Tunillatsinnermiit nappaammut ersiutit siulliit nualluutinut allanut sanilliullugit ullut ataatsimiit pinga-sunnut sivisussuseqartarput. Tunillatsinnerup nappaatillu malunnarsinerata piffissartaata qanoq sivisutigisarnera suli qularnaarlugu aalajangersaavigineqarsimanngilaq. Taamaattumik maannakkuugallartoq ullut arfineq-marluk tikillugit aalajangersaavigineqarallarpoq.

Kalaallit Nunaanni kikkut nualluummik nutaamik tunillatsinnissaminnik ulorianartorsiorpat?

• Inuit nualluummut tunngassuteqartumik nappaammut ersiutillit ullut arfineq-marluk ingerlaneranni nunanit allaniit nualluummik nutaamik nappaateqarfinniit tikittut.
• Inuit nualluummut tunngassuteqartumik nappaammut ersiutillit ullut arfineq-marlunniit qulit ingerlaneranni nunanit allaniit nualluummik nutaamik nappaateqarfinniit tikittut inunnik alla-nik attaveqarsimasut.

Nualluut nutaaq qanoq pinartigaa?

Nualluutitut allatulli nualluut nutaap pinartigisarnera annikitsuuvoq annertuujusarsinnaallunilu. Nualluummut nutaamut atatillugu maannakkuugallartoq Mexicop avataani toqusut ikittunnguit taamaallaat nalunaarutigineqarput. Nualluutip nutaap sakkukitsutut pinartutulluunniit pileriartortarnera suli oqaatigineqarsinnaanngikkallarpoq. Ilimanarpoq, nualluut nutaaq pinartumik nappaataalersinnaasoq, taamatulli ulorianarsisinnaanera suli qularnaarlugu oqaatigineqarsinnaanngilaq.

Kikkut nuallunnermikkut immikkut ulorianartorsiorpat?

Puavit sulisinnaanerat annikillisimappat, astmaqaruit, uummallukkuit, sukkoruit puakkulluunniit nappaateqaruit nualluut sianiginiarluassavat. Taamatuttaaq nualluut immikkut sianiginiassavat naartuvuit imaluunniit meerarisat suli marlunnik ukioqalinngitsoq nuallulerpat.

Nunanit allaniit nualluummik nutaamik nappaateqarfinniit tikikkuma qanoq iliussaanga?

Nappaateqanngikkuit immikkut qanoq iliuuseqartariaqanngilatit.
Nualluummik ersiuteqaleraanni peqqinnissaqarfimmut telefonikkut attaveqartoqartariaqarpoq. Peqqinnissaqarfimmi sulisorisat nalilissappassuk, nualluummik nutaamik tunillatsinnissamik ulorianartorsiortoqartoq, toqqusaami misiligutissamik peersinissaq pillugu isumaqatigiissusiortoqassaaq. Pingaaruteqarpoq, inuit napparsimasut isumaqatigiissusioqqaaratik nakorsiartarfiit utaqqisarfiinukartarnissaat, inuimmi amerlasuut tunillanneqarsinnaanerat ulorianaateqalissammat.

Nualluut nutaaq qanoq iliornikkut katsorsarneqartarpa?

Nalinginnaasumik nuallunneq katsorsarneqarneq ajorpoq.
Nualluutip nutaap virusia Tamiflumut sunnertiasunnguuvoq. Virusi nutaaq Tamiflumut sunnerneqarsinnaanngitsutut paasineqarpoq, pisunili amerlanerni Tamiflu ajorneq ajorpoq. Influenza A (H1N1)v-p kingunerluutit malitseqaataasumillu nappaatit antibiotikamik katsorsarneqartarput. Pisariaqarfiatigut katsorsaanissaq nakorsap isummerfigisassaraa.

Nualluummut nutaamut akiuussutissaqarpa?

Nualluummut nutaamut maannakkut akiuussutissamik peqartoqanngilaq. Nualluummut nutaamut akiussutissaq ukiamut piariissangatinneqarpoq. Kalaallit Influenza A (H1N1)v-mik tunillatsinnermikkut pinartumik napparsimalernissamut ulorianartorsiortut ukiamut akiuussuserneqarnissaminnut neqeroorfigineqassapput.

Nualluummut akiuussutissaq nalinginnaasoq Influenza A (H1N1)v-mut illersuutaasinnaava?

Naamik, ilimananngilaq akiuussutissaq nutaaq ukiup ilaani ”nalinginnaasumik” nualluttarnermut nutaamut sunniuteqassasoq, taannami nualluummut H1N1-imut ilaasuunngimmat.

Puulukip neqaanik nerinikkut nualluut nutaaq atugaalersinnaava?

Naamik, puulukip neqaanik nerinikkut nualluut nutaaq atorneqalersinnaanngilaq.

Nunanut allanut angalanissaq isumannanngila?

Nunatsinni Nakorsaaneqarfiup angalasarnissat inerteqqutaatinngilai – USA-jugaluarpat, Mexico-galuarpat imaluunniit nunat tunillaaffiusut allaagaluarpata. Angalasut nunat angalaffissatik pillugit pissutsit pillugit paasiniaasariaqartassapput sumiiffinnilu oqartussaasut nunallu tamalaat peqqinnissamut suliniaqatigiiffiata WHO-p kaammattuutigisartagaat maleruartariaqartassavaat. Angalasut kaammattorneqarput nittartakkat pisariaqartut misissuiffigisassagaat paasiniaaffigisassallugillu (Udenrigsministeriet, WHO nunallu pineqartut peqqinnissakkut oqartussaasui).

Ernumanissamut tunngavissaqarpa?

Inuit amerlanerit Influenza A (H1N1)v pinartuunngitsutut atortarpaat, sapaatip akunnerata ataatsip ingerlanerani pilersuuppat. Taamaattumik Nunatsinni Nakorsaaneqarfiup nalilerpaa, Kalaallit Nunaanni innuttaasut ernumassuteqarnissaminnut tunngavissaqanngitsut.