AG-mi marlunngornermi januaarip ulluisa 30-anni tusagassiortoq Elna Egede inerniliivoq, meeqqat atuarfianni klasseni angajullerni meeqqat quliugaangata ataasiinnaq ilinniarnertuunngorniarfimmi ilinniarnerminik naammassinnittartoq - tassa 10 %-ii. Kisiannili inerniliineq kisitsisinik kukkusunik imaluunniit kukkusumik naatsorsuinermik tunngaveqarpoq.
Imaakkamimiaa meeqqat atuarfianni klasseni angajullerni atuartut 20 %-ii ilinniarnertuunngorniarfimmi ilinniarnerminnik naammassinnittarlutik.
2002-mi inuusuttut 300-t ilinniarnertuunngorniarfimmi ilinnialerput (paasissutissarsiffik takuuk). Ukiut pingasut qaangiummata 147-t ilinniarnertuunngorput. Tamanna isumaqarpoq inuusuttut 2002-mi aallartittut 48,3 %-ii ilinniarnertuunngorniarfimmi ilinniarnerminnik naammassinnissimasut.
2006-imi naammassinnittut procentiat qaffasinneruvoq tassami inuusuttut 2003-mi aallartittut 60 %-ii ilinniarnertuunngormata. Aallartipput 308-aallutik. Ukiut pingasut qaangiummata katillugit ilinniarnertuutut 184-it naammassipput.
Ukiumut inunngortartut agguaqatigiissillugu 900-t missaanniittarput (paasissutissarsiffik takuuk). Taakku pinajorarterutaasa missaat ilinniarnertuunngorniarlutik ilinnialersarput, taakkunanngalu 50-60 % naammassinnittarput. Tamanna isumaqarpoq inuusuttut tallimaagaangata ataaseq klassenit angajullerneersoq ilinniarnertuunngorniarfimmi ilinniarnerminik naammassinnittartoq - tassalu 20 %-ii. Taamaammat kalaallit inuusuttut ilinniagaqartarnerat Elna Egedep allaaserisamini annilaarsaarutigisaanit qaffasinnerungaatsiaqaaq.
Allaaserisami tassani Elna Egede inerniliivoq 2005-imi ilinniartitsisutut ilinniarsimasut ikileriangaatsiarsimasut. Tamannali nassuiaatissaqarpoq, tassami ukiut aappassaanni aatsaat najukkaminniiginnarlutik ilinniartitsisunngorniartut ilinniarnerminnik naammassinnittarmata. Tassami 2004-mi ilinniartitsisutut naammassipput 34-t, 2005-imi 19-it 2006-imilu 33-t.
2004-mi 2006-imilu najukkaminniiginnarlutik ilinniarfissuarmiillutillu ilinniartitsisunngorniartut ilinniarnerminnik naammassinnipput. 2005-imi najukkaminniiginnarlutik ilinniartitsisunngorniartunik ilinniarnerminnik naammassinnittoqanngilaq.
Paasissutissarsivik: Naatsorsueqqissaartarfik 2006 figur 15.4 og 4.2.
Inussiarnersumik inuulluaqqusillunga
Gitte Hertling
Ilinniartitaanermut inspektøri
KIIIP