Asasakka tamassi - unammisitsinermut ilaasut, aaqqissuisut qaaqqusallu.
TAPPIORANNARTUT pillugit uumasunik ilisimasallit unammisinneqarnerneranni MIKRObiologernes Galathea 3-mi unammisitsinermi ajugaasup akissarsiassaa tunniussinnaagakku nuannaarutigaara. Tamanna nuannersuuvoq arlalinnik pissuteqartumik.
Pingaaruteqarpoq Nunatsinni inuusuttut ilisimatusarnermut ilisimatuussutsimullu soqutigisaqarmata. Nunarput siunissami ilisimatuunik atorfissaqartitsivoq. Massakkorpiaq isersimaffigaarput ilisimatusarfiit ilaat ukiuni kingullerni Nunatsinni piorsaaffigineqartoq. Pinngortitaleriffik ilisimatuut nunarsuarmit tamaneersut ornissallugu kajungerisuuvaat; pingaaruteqarporli kalaallinik ilisimatuunik ataatsimoortunik tunngaviusunik peqarnissaa.
Oqaatigissallugu pingaartuuvoq ilisimatusarneq ilisimatuussuserlu pissanganartuummata, soqutiginarlutik nuannersuullutillu. Ilisimatusarneq tassuunakkullu angusat ilisimatuunut kisimi sammineqartussiaanngillat aammali inuiaqatigiinni innuttaasunut nalinginnaasunut attuumassuteqartinneqarlutik. Tamatuma suliarinissaanut periaatsit ilagaat ilisimatusarnerup, taakkuninnga ingerlatsinerup atuartitsinerullu imminnut ataqatigiissinnissaat tamannalu suliniummi unammisitsissutigineqartumi pineqarpoq. Tassanilu qulequtarineqarluni ¿Kalaallit Nunaanni immap iluani sukarsuarni Ikait-nik taaneqartartuni enzymit siunissami piusussat¿.
Pingaartuuvoq erseqqissassallugu nunani issittuni ilisimatusarnermut Kalaallit Nunaat immikkut illuinnartunik periarfissaqartitsimmat - ataatsimullumi isigalugu nunat tamat ilisimatusarneranni. Immap iluani sukarsuit Ikait taakkulu pinngorfii immikkut ittut nunarsuarmi sumiiffimmi ataasiinnarmi nassaassaapput - tassalu Kujataani kangerlummi Ikkami. Sermersuaq nunat tamat ilisimavaat immikkullu illuinnartunik periarfissaqartitsilluni ilaatigut klimap allanngortarneranut atatillugu ilisimatuutut misissuisarnermut. Kisianni aamma Kalaallit Nunaat allanik arlalippassuarnik nunani tamalaani soqutiginaateqartinneqarpoq. Assersuutitut taaneqarsinnaavoq nunat tamat 2007/08-mi issittunut ukioqartitsinerannut tunngatillugu nunani tamalaani ilisimatusarfiit suleqatigiissut 140-mmaata Kalaallit Nunaannik sammisaqarlutik suliniuteqartut. Ilisimatusaqatigiinni taakkunani ilisimatuut 3400-it peqataapput.
Pingaartuuvoq maluginiassallugu ilisimatusarneq ilisimatuussuserlu Kalaallit Nunaata ineriartortinneranut peqataasinnaammata. Tamannalu tassaavoq unammisitsinermi tunuliaqutaasoq assersuutissaqqissoq. Immap iluani sukarsuit Ikait misissuiffiginerat uumasut pillugit ilisimatuutut ilisimasat immikkut ittut pillugit nutaanik ilisimasaqarfigineqaliinnanngillat, kisiannili aamma inuiaqatigiit kalaallit ineriartortinnerannut peqataasinnaallutik, enzymit iluaqutiginiarneqarsinnaasut nassaassaappata. Pingaaruteqarpoq siunissami iluaqutiginiarneqalersinnaanerat Kalaallit Nunaannut iluaqutaasumik kinguneqarnissaa. Taammaattumik Naalakkersuisut tamakku siunissami iluaqutiginiarneqarsinnaanerat misissuiffigineqarnissaat illersorneqarnissaallu pillugit inatsisiliassamik siunnersuuteqarput. Siunnersuut atorlugu misissuinerit inernerisalu atorneqarsinnaaneri aqunneqassapput qulakkiissallugulu Kalaallit Nunaata annertunerpaamik iluaqutigissagai.
Taamaattumik periarfissaq manna atorusuppara unammisitsinermi aaqqissuisut qutsavigissallugit ¿ tassaasut Landbohøjskolen, Københavns Universitet, Dansk Polarcenter aamma Inutek kiisalu Novozymesimit aningaasaliisoq.
Siullermilli unammisitsinermi ajugaasoq Pilluaqqorusuppara, tassaasoq Ilinniarnertuunngorniartoq Malik Lund, Aasianni 2.G-mi atuartoq. Takutippat manna ilisimaarigit: ilisimatuussuseq soqutiginnaateqanngitsuunngitsuusoq, akerlianilli pissanganartuusoq, soqutiginartuusoq nuannersuusorlu. Neriuutigaara ilisimatuut peqatigalugit aasaanerani kangerlummi Ikkami kingornalu laboratoriami sulineq ilinnut misigisaassasoq pissanganartoq tamannalu illit - allallu - sunniisigissagissi Kalaallit Nunaanni pinngortitamik ilisimatuussusermi ajornartorsiutit nangillugit suliareqqinnissaannut.
Matumuuna ajugaasumut diplomi ilinnut tunniuppara. Aamma tunniutissavara tujuuluaraq fleeceq Novozymesimit aningaasalerneqartoq.
Pilluarit.
