Kangerlummi Ikka-mi pilersaarutinut atatillugu ilisimasassarsiortussat Galathea 3-mik taaneqartut nunatsinni ilinniarnertuunngorniarfinni atuartut akornanni siunissami tappiorannartut enzymit atorneqarsinnaanerat pillugu unammisitsineranni Naalakkersuisut ilinniarnertuunngorniaq Malik Lund Aasianni 2.G-mi atuartoq ajugaasutut pilluaqquaat.
Naalakkersuisut pingaartippaat inuusuttut ilisimatusarnermik soqutigisaqarnissaat, tamanna inuiaqatigiit ineriartorteqqinnissaannut peqataassammat. Nunarput nunat tamat ilisimatusarneranni nalunngisaavoq ilisimatuullu nunarsuup sinneraniit maannarumasaannarput; kisiannili pingaaruteqarluinnarpoq maannakkut siunissamilu kalaallinik ilisimatusartoqarnissaa, taamaliornikkut nunat tamat ilisimatusarnikkut sulinerat nunatsinnut kisarneqartutut issammat.
Naalakkersuisut iluarisimaarpaat Malik Lund nunatsinni unammisitsinermi ajugaasuuginnarani aamma naalagaaffeqatigiinnerup iluani unammisut akornanni pointinik amerlanerpaanik pissarsisimammat.
Naalakkersuisut neriuutigaat unammisitsinerup takutissagaa ilisimatusarnerup pissanganartuusinnaanera, nuannersuusinnaanera soqutiginartuusinnaaneralugu aammalu unammisitsineq kinguneqassasoq inuusuttut amerlanerit ilisimatusarnermik soqutiginnilernerannik.
