Atuartut angerlarsimaffii pillugit ilanngutassiamut oqaaseqaat.

Naalakkersuisoqarfiup aamma paasivaa aallakaatitami ernumassutigalugu oqaatigineqartoq nunaqarfinni atuarfiit 20-t ataallugit atuartoqartut Naalakkersuisut matulersaaraat – taamaattoqanngilaq. Akerlianik atuartut angerlarsimaffii pillugit nassuiaateqarnikkut atuartut nunaqarfinni atuarfinni atuartinneqarnerminni pissarsiaat qanoq annertusarneqarsinnaanersut pillugit ammasumik oqallittoqarnissaa ersarissunillu inassuteqaateqartoqarnissaa Naalakkersuisut kissaatigaat.

Meeqqat atuarfii, tassunga ilanngullugit nunaqarfinni atuarfiit ingerlanneqarneri, kommunit akisussaaffigineqarput, taamaammallu kommunini atuarfiit, tassunga ilanngullugit nunaqarfinni atuarfiit, qanoq aaqqissuussaanissaannik kommunalbestyrelsit maannakkut kisimik aalajangiisinnaapput.

Kisiannili atuarfinni ilinniartitsinissamik angerlarsimaffimmiluunniit ilinniartitsinissamik qaqugukkut neqerooruteqartoqartassanersoq ullumikkut ersarissunik najoqqutassaqanngilaq. Aammattaaq assersuutigalugu nunaqarfinni ilinniartitsisut ilinniarsimasut sulisussarsiarineqarsinnaanngippata atuartitsinerup imarisaa pitsaassusaalu inatsisini piumasarineqartut nunaqarfinni atuarfinni malinneqarsinnaanngippata kommunalbestyrelsit qanoq iliuuseqartassanersut pillugit ersarissunik najoqqutassaqanngilaq.

Taamaammat atuarfinni atuartitsinissamik neqerooruteqartoqannginnerani sumiiffinni meeqqat qanoq amerlatigissanerisa inatsisini ersarissunik najoqqutassaqarnissaa aammalu atuartitsinerup illersorneqarsinnaasumik ingerlanneqarnissaanut najoqqutassat kommunit arlaleriarlutik ujartortarnikuuaat. Taamaammat atuartut inaat pillugit nassuiaammi apeqqutit erseqqissarneqarnissaat akornutaannillu upaaruaanissaq Naalakkersuisut qinerpaat, atuartitsinerup qaqugukkut minnerunngitsumillu qanoq atugassaqarluni ingerlanneqarnissaanut ilimagisat ilinniartitsinerullu pitsaassusissaanut piumasaqaatit aammalu ajornartorsiutaasinnaasut aaqqiiviginiarlugit qanoq iliortoqassanersoq ammasumik asissuinngitsumillu taamaalilluni oqallisigineqarsinnaaniassammata.

Tusarniaanermi akissutit Ilinniartitaanermut Naalakkersuisoqarfiup ulluni makkunani tigoorarpai. Taamaammat nunaqarfinni atuarfinni atuartitsinerup qanoq iliorluni pitsanngorsarneqarnissaanut isumassarsiat nutaarpassuit tigunissaannut pissangalluta qilanaarpugut. Tusarniaanermi akissutit nalunaarusiami ilanngunneqassapput, taassumalu kingorna sumiiffinni nunamilu tamarmi politikikkut oqallisigisassanngorlugit avammut saqqummiunneqassalutik. Nalunaarusiaq taassumalu kingorna oqallinneq ilinniartitaanermut periusissatut pilersaarummi nutaami ukioq manna upernaakkut ataatsimiinnermi Naalakkersuisut Inatsisartunut saqqummiussassaanni soorunami ilaassapput.