Meeqqanut suli atualinngitsunut peqqussut nutaaq

Taamaalilluni Meeqqerivitsialaap timitalernissaanut alloriartoqarpoq.

Atuarfitsialammi suliat aallarteriikkat nangillugit Naalakkersuisooqatigiit ineriartortitsinermi ilinniartitaanermilu sutigut tamatigut suliat ataqatigiinnissaat kissaatigaat.

2005-imiilli nuna tamakkerlugu ataatsimiisitsinerit assigiinngitsut ingerlanneqarput, tassanilu isumassarsiat siunissamilu ulluunerani neqeroorutit pillugit siunnersuutit katersorneqarput. Suleqatigiissitat assigiinngitsut allanngortiterinermik suliallit pilersinneqarput, ilaatigut malittarisassat aamma perorsaanermi ilinniarnerit maannamut atuuttut nalilersuiffigineqarlutik. Kommunini sisamani perorsaavinni misileraasoqarpoq ineriartortitsisoqarlunilu, tassanilu meeqqeriviit arfinillit peqataapput. Meeqqeriviit tamarmik angutserlugit pikkorissaasoqarlunilu ilinniartitseqqiisoqassaaq.

Meeqqanut suli atualinngitsunut perorsaanikkut inerikkiartuutaasunik ulluunerani neqerooruteqartarneq pillugu Inatsisartut peqqussutaata imarisai pingaarnerit makkuupput:

- Siunertassatut oqaasertaliussat allanngortitat ulluunerani neqeroorutit suunerannik nassuiaatitallit oqartussaasullu ataasiakkaat akisussaaffiinik erseqqissaasut.

- Kommunit meeqqanut inuusuttunullu politikkiliornissaannik piumasaqaat.

- Meeqqat ataasiakkaat pillugit pitsaanerusumik suleqatigiinneq.

- Meeqqerivinnut ataasiakkaanut erseqqissumik akuersissummik uppernarsaateqalernissaq.

- Perorsaanikkut inerisaavimmik ilisimatusarnermillu pilersitsineq.

- Pitsaanerusumik naliliisarneq uppernarsaasersuinerlu.

- Ulluunerani neqeroorutit ataasiakkaat aqunneqarnerinut ilusiliussaq nutaaq, atuisut (angajoqqaat) tamarmik oqartussaaqataanissamut periarfissinneqarfigisaat.

- Angajoqqaat angerlarsimaffimmi paarsititsisartut oqartussaaqataanissamut periarfissaqarnerulernerat.

- Pisortanut piumasaqaatit erseqqinnerusut.

- Sumiiffinni ataasiakkaani sammisaqartitsinissamik allanik neqeroornissamut periarfissat.

- Inissamik innersuusseriaaseq pisariinnerusoq.

Meeqqap qitiutinneqarnissaa pingaartinneqarpoq aamma meeqqat inuttut pisinnaatitaaffinnik tunngaviusumillu kiffaanngissuseqarnermut pisinnaatitaaffinnik ataqqinnilernissaat kiisalu FN pillugu Angeqatigiinnermi najoqqutarineqartut paasitinneqarnissaat siunertarineqarpoq. Ilanngullugu aamma meeqqap angajoqqaavisa ataqqineqarnissaat, nammineq kulturikkut kinaassutsip, oqaatsit pingaartitallu ataqqineqarnissaat naqissuserneqarpoq kiisalu meeqqap inuiaqatigiinni naqisimaneqanngitsuni akisussaassusseqartumik inuianillu tamani inooqateqalernissamut piareersarnissaa pineqarpoq.

Aningaasanut Inatsisip 2009-moortup Inatsisartunit akuerineqarnerani misileraanerit ineriartortitsinerillu ingerlasut ukiuni sisamani tulliuttuni nangeqqinneqassapput pimoorunneqarnerulissallutillu.