Ammaanersiornermi oqalugiaat

Asasakka Ilimmarfimmi sulisut, ilinniartut, qinikkat, sanaartornermi aqutsisut, qaaq­qusat aamma rektori!

Ilimmarfiup illutaasa atoqqaartinneqarnerannut Naalakkersuisut sinnerlugit tamassi tikilluaqquassi.

Ilimmarfiup illutaasa pilersinniarneranni oqallinnerit, pilersaarusiornerit aamma poli­tikkikkut isu­masioqatigiinnerit annertuut pisimapput. Naalakkersuisullu Ilimmarfiup pilersinneratigut siunerta­raat qulakkiissallugu inuiaqatigiinni ilisimasaqarneq, ineri­artorneq aamma siumukarneq.

Aammattaaq Naalakkersuisut siunertaraat inuusuttut amerlanerusut nunatsinni ilinni­arusulernissaat ilinniartitaanerillu pitsaassusaasa malunnaatilimmik qaffariarnissaat.

Kiisalu Naalakkersuisut Ilimmarfimmik pilersitsinikkut siunertaraat nunarsuaq ta­makker­lugu ilisi­matuut nunanik issittumiittunik inuinillu sammisallit ataatsimoorfe­qalernissaat, taamaalil­luni Ilim­marfiup pilersinneqarneratigut ilisimatusarnerup suli siuarsarnissaa anguneqassammat aammalu nunanik allanik ilisimatusarnikkut sule­qateqarneq annertusarneqassammat, Inuit Nunaannut iluaqutaa­sumik.

Ullumikkut inuiaqatigiittut inuttullu ajornartorsiutigisartakkatta qaangerniarnerini aamma inuussu­tissarsiornikkut kulturikkullu anguniakkatta piviusunngortinniarnerini sulisorisatta kinaassutsimin­nik oqaatsiminnillu innarliinatik ilinniarluarnissaat pisari­aqarpoq.

Ineriartornerup nukittorsaanerullu inuiattut inuttullu anersaarisatsinnik naggorissaa­sup akuersaar­tullu Ilimmarfimmi angerlarsimaffeqarnissaa anguniarparput. Neriup­pugut Ilimmarfik tassaajuaru­maartoq anersaakkut, tarnikkut timikkullu pissassarnit­sinni kuunnguup pikialaartuarfissaa.

Naalakkersuisunit immikkut qutsavigerusupparput aningaasaateqarfik Aage V. Jen­sens Fonde. Aage V. Jensens Fondep aningaasaliissuteqarneratigut Ilimmarfiup Pin­ngortitaleriffiullu ataqatigiis­sakkamik illutamikkut avatangiiserisamikkullu ataatsi­moortumik pilersaarusiorneqarnerat qulaak­keerneqarpoq. Maani peqataasoq Leif Skov, Aage V. Jensens Fonde-p siulittaasua, qinnuigisaavara aningaasaateqarfimmut qamannga pisumik qujanerput ingerlateqqeqqullugu

Ilimmarfiup illutaasa isumaliutigeqqaarneranniit pilersinneqarnerannut ukiut qulit sinnerlugit i­ngerla­simapput. Taamaalillunilu ilinniartitaanermi naalakkersuisuusartut arlallit Ilimmarfiup piler­sin­neqarnissaanut peqataasimapput.

Kisianni naalakkersuisuusarsimasut pingasut ukuusut immikkut taanneqarnissaat pis­susissamis­suussaaq: Konrad Steenholdt, Ilimmarfiup sanaartorneqarsinnaaneranik Naalakkersuisunut Inatsi­sartunullu saqqummiusseqaartuusoq. Lise Skifte Lennert, Ilimmarfiup pilersaarusiorneqaranik sa­naneqarnissaanillu Naalakkersuisunut aamma Inatsisartunut saqqummiisimasoq, kiisalu Henriette Rasmussen, aningaasanik sa­naartornermi atugassanik Inatsisartut Aningaasanut Inatsisaannut inis­siinermi saq­qummiussisuusimasoq. Maanna Naalakkersuisuusut sinnerlugit tamassi sulilluarsima­nersi pillugu qujaffigiumavassi.

Ilimmarfiup sanaartorneqarnerani sulisunik nakkutilliineq annertooq imaannaannge­qisorlu suliarine­qarsimavoq. Nakkutilliisuuvoq Tegnestuen Nuuk ulluin­narnilu nak­kutilliineq pitsaalluin­nartumik isumagisimallugu, sanaartorfimmi ulluinnarni pisorta­risi­mallugu, Ole Stroebel.

Tegnestuen Nuuk aamma Ole Stroebel ima pitsaatigisumik suliaqarsimapput Ilim­marfiup illutai nakkutilliisunit piffissaq eqqorlugu 16. oktober 2007 Namminersorne­rullutik Oqar­tussanut tunniun­neqarsinnaasimallutik. Kiisalu Namminersornerullutik Oqartussani Attaveqarnermut Avatangiisi­nuullu Naalakkersuisoqarfimmi atorfilik Per Correll suliamik pitsaasumik ingerlatsisimavoq, Ole Stroebel KIIIN-ilu ulluinnarni suleqatigilluarlugit. Piffissaq manna iluatsillugu, Attaveqarnermut Avatangiisinullu Naalakkersuisoq, Kim Kielsen qinnuigissavara qujassuterput naalakkersuisoqar­fim­minut apuuteqqullugu.

Nalunngilara inuppassuit annertuumik suleqataasimasut immikkut qutsavigisariaqa­raluartut maani piffissaqannginneq pissutigalugu taanngitsoortariaqarlugit. Imatullu oqarusuppunga: Tamassi ilu­moorlusi sulinissigut illu manna pingaaruteqaqisoq ullu­mikkut atoqqaartinneqarsinnaanngorpoq.

Ilimmarfimmik ulluinnarni atuisussat ukuupput: Groenlandica, Nunatta Allagaateqar­fia, Oqaasileriffik, Kalaallit Nunaanni Naatsorsueqqissaartarfik aamma Ilisi­matusar­fik. Illutaassinnik pilluaritsi. Inuiaqatigiinnik kiffartuussinissinni sulinissinnilu pit­saaner­paanik angusaqartarnissas­sinnik Naalakkersuisut sinnerlugit kissaappassi.

Taama oqaaseqarlunga ilinniartitaanermi, ilisimatusarnermi, uppernarsaasersui­nermi ingerlatitseq­qiinermilu katersuuffiup Ilimmarfiup pisortatigoortumik atoqqaartinne­qarnera ammarneqarneralu nalunaarutigaara.