Aningaasaliissutit atuartut amerlassusiat naapertorlugu ikiliartorput

Aallaqqaasiullugu Naalakkersuisut eqqaassavaat "annertusisamik immikkut atuartitsinermik" oqariaaseqarneq tunngavimmigut atorunnaarmat, aningaasaliissutillu atuartut ikiliartornerat pillugu naleqqussarneqarmata.

Peqqussut 2002-meersoq naapertorlugu naatsorsuutigisaavoq atuartut atuarnerminni immikkut ikiorsertariaqalerallartut, ataasiakkaarlutik ikiorserneqartassasut, peqqussutip eqaatsumik pilersaarusiorsinnaanermik holdikkaarillunilu atuartitsinnaanermik periarfissarititai aqqutigalugit, tassuunakkullu immikkut aaqqissuussamik atuartittariaqartutut isigineqarunnaarlutik, atuartut tamarmik atuartitsinermi inissaqartinneqartussaammata.

Atuarfik pillugu peqqussutip akuerineqarneraniilli anguniagaavoq kommunit immikkut atuartitsinermut tunngasunik tigusinissaat, tassami atuarfiup aqutarineranut, atuartitsinerup aaqqissuunneranut, pilersaarusiorneranut ingerlanneranullu akisussaaffik kommunineereerpoq. Taamaalilluni kommunit tassaalerput immikkut atuartitsinermik pisariaqartitsinerup qanoq annertutigineranik ilisimasaqartuusut.

Kisianni immikkut atuartitsinermut tunngasut kommunit maannamut suli tigujumasimanngilaat, ilimanarlunili kommunerujussuanngortut aatsaat akisussaaffik tigussagaat. Tassunga tunngatillugu soorunami Naalakkersuisut KANUKOKA suleqatigalugu immikkut atuartitsinermik pisariaqartitsivinnerup tamakkiisumik qulaajarnissaa peqataaffigiumavaat, minnerunngitsumillu tiiminik agguaasseriaatsit, aaqqissuusseriaatsit, ingerlatsinerit pitsaassutsillu misissuiffiginissaat peqataaffigerusullugu. Aammattaaq Naalakkersuisut kommunit aningaasartuutaasunik utertoortarneranni tunngaviusut - aningaasartuutiviusut aallaavigalugit pisalernissaat angujumallugu - isumaqatigiissutiginiarnissaannut piumassuseqarput.

Naalakkersuisut takujuminaatsippaat aningaasaliissutit 40 % angullugu ilaneqartariaqarnerannik IMAK-kip oqariartuutini qanoq tunngavilersorneraa, tassami meeqqat atuarfianni atuartut amerlassusaat 2007-imi 10.448-uusinnarlutik 2009-mi 8.987-iunngussapput, 2015-illu tungaanut ikiliartuaassallutik, taamanikkumut 8.161-iunissaat ilimagisaalluni.