Allataallunilu tusagassiisartumik

Inuk avatangiisini pissanganartuni assigiingiiaartorujussuarnilu naalakkersuinikkut aaqqissuussaanikkullu suliassanik suliaqarnissamut piumassusilik piaartumik atorfinittussatut pissarsiariniarneqarpoq.

Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoqarfimmi ingerlatat pissanganartorpassuit ukiuni tulliuttuni piviusunngortinneqartussat ingerlanneqarput. Tamatuma saniatigut oqartussaaffiit innuttaasunit naalakkersuinermillu suliaqartunit sammineqartorujussuupput.

Naalakkersuisumut allattaalluniluta tusagassiisartup akisussaaffii suliassaalu:

Naalakkersuisumut allattaallunilu tusagassiisartoq aaqqissuussaanikkut Allattoqarfimmi inissisimavoq suliassanillu makkuninnga isumaginnissalluni:

• Tunngavissianut, oqalugiaatinut, allakkianut, tusagassiorfinnut nalunaarutinut il.il. Naalakkersuisumut siunnersuusiorneq
• Naalakkersuisup tusagassiuutinut atassuteqarneranik isumaginninneq
• Oqaatsitigut allakkatigullu saaffiginnissutinut Naalakkersuisup akissutissaanik isumaginninneq
• Naalakkersuisup sulianik suliaqarnerani ikiuunneq isumaginninnerlu
• Allattoqarfimmi sulisut allat suleqatigalugit Naalakkersuisup ataatsiminnissaanik angalanissaanillu aaqqissuussineq.

Naalakkersuisumut allattaallunilu tusagassiisartoq Naalakkersuisup angalaneranut ilaasassaaq taamaattumillu angalasarnissaq naatsorsuutigineqartariaqarpoq.

Piginnaasat:

Inuppassuarnut attaveqartarneq atorfimmut ilaavoq. Taamaattumik Naalakkersuisup allattaata tusagassiisartuatalu ataqatigiissarilluarsinnaanissaa, aaqqissuussinissamut piumassuseqarnissaa, ammasuunissaa kiisalu allakkatigut oqaatsitigullu piginnaaneqarluarnissaa pingaaruteqarpoq.

Naalakkersuisup allataata tusagassiisartuatalu assigiinngitsunik soqutigisaqaqatigiinnit assigisaannilluunniit naalakkersuinikkut allatulluunnit aaqqissuussaanikkut misilittagaqarnissaa iluaqutaassaaq piumasaqaataananili.

Naalakkersuisup allataata tusagassiisartuatalu Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoqarfimmi suleqataasa suliassat assigiinngitsorpassuit suliarisarpaat. Taamaattumik pineqartup suliatigut aaqqissuussaanikkut naalakkersuinikkullu ajornartorsiutinik ilungersunartunillu suleqataasinnaanissamut piginnaasaqarnissaa kissaatiginarpoq.

Ilinniagaqarnikkut tunuliaqutaq aalajangiisuussanngilaq, taamaattorli Naalakkersuisup allataa tusagassiisartualu Nunatsinni tamaanilu inuiaqatigiinni pissutsinut ilisimasaqarluartariaqarpoq. Naalakkersuisup allataa tusagassiisartualu allattariarsornikkut oqaluttariarsornikkullu marluinnik kalaallisut/danskisut tamakkiisumik oqaaseqartuunissaa piumasaqaataavoq. Tuluttut minnerpaamik oqaloqateqarsinnaanissaq naatsorsuutigineqarpoq.

Akissarsiat atorfinitsitsinermilu atugassarititat:

Taakkununnga ilanngullugit atorfininnermi soraarnermullu atatillugu angalanermut pisattallu a-ngallanneqarnerinut akiliunneqarsinnaaneq Naalakkersuisut pineqartullu kattuffiata isumaqatigiinniarsinnaatitaasup akornanni isumaqatigiissut atorfinitsitsinerup nalaani atuuttoq naapertorlugu pissapput. Tamatuma nassataraa isumaqatigiissut naapertorlugu akissarsiaritinneqartut saniatigut Naalakkersuisumut allattaanermut tusagassiisartuunermullu tapinik naalakkersuisumut allatsitut tunniussisoqarsinnaanera. Isumaqatigiissutit arlaannut attuumassuteqarnani qinnuteqartoq immikkut isumaqatigiissusiornikkut atorfinitsinneqassaaq.

Atorfimmut atatillugu inissaqartitsisoqarsinnaavoq malittarisassat atuuttut naapertorlugit akilersorneqartussamik. Taamaattorli Nuummi inissaaleqineq pissutigalugu ataavartumik inissaqalernissap tungaanut sivisuumik utaqqiisaasumik inissiamiitinneqarnissaq naatsorsuutigineqartariaqarpoq.