Tapiissutinik agguaassineq

Ilinniartitaanermut, Ilisimatusarnermullu Naalakkersuisoqarfik ilisimatusarnissamut pilersaarutinut aallartinniakkanut tapiiffigineqarnissamik matumuuna qinnuteqaqqusivoq. Pilersaarutit aningaasaateqarfinnit allanit aningaasaliiffigineqartussatut anguniakkat pingaarnerutinneqassapput. Sivikitsumik akissarsiaqartitsinermi aamma atortussanut angalanermullu aningaasartuutit tapiissuteqarfigineqassapput. Pilersaarutit ingerlareersut aamma tapiissuteqarfigineqarsinnaapput.

Pilersaarutip tunuliaqutai, ilisimatusarfinnut atassuteqarneq aamma pilersaarummi anguniarneqartut qinnuteqartunit nassuiaatigeqquneqarput. Pilersaarummi periaasissatut isumaliutit aningaasatigullu missingersuusiat ilannguteqquneqarput. Qinnuteqaatit naliliiffigineqarneranni Kalaallit Nunaannut atassuteqarneq pingaartinneqassaaq.

Namminersornerullutik Oqartussat suliniuteqarfiinut attuumassuteqartut avatangiisinut, pinngortitamut, nukissaqarniarnermut, kultureqarnermut aamma Kalaallit Nunaanni inuiaqatigiit inuussutissarsiutillu ineriartortinneqarnissaannut tunngassuteqartut pilersaarutitut siunnersuutit pingaartinneqarnerussapput. Siunnersuutit qulaani pineqartunut attuumaasuteqanngikkaluartut aamma tapiissuteqarfigineqarsinnaapput.

Matumani qinnuteqarnermi tipsernermit, lottornermillu aningaasanik tamanit iluaqutigineqarsinnaasumik ilisimatusarnermut agguaanneqartartut ilanngunneqarput. Qinnuteqarnermut immersuiffissaq ataasiinnaavoq, aamma qinnuteqarfigisimasat immikkoortinneqassanngilat. Qinnuteqaatinik naliliinermi ilisimatusarnissamut pilersaaruteqarnermut qinnuteqaatit agguaanneqartarnerat assigalugu tipsernermit lottornermillu aningaasanik qinnuteqaatit nalilerneqassapput.

Qinnuteqaatit naliliiffiginissaannut ataatsimiititamik pilersitsisoqassaaq.

Ilisimatusarnermut aningaasat atugassanngortinneqartut agguaanneqartussat 700.000 koruunit missaannik amerlassuseqarput.

Qinnuteqarnermi allattuiffissiaq immersorneqassaaq, quppernermi uani pissarsiarineqarsinnaasoq www.nanoq.gl/IIN Ilinniartitaanermut, Ilisimatusarnermullu Naalakkersuisoqarfimmiit, Ilisimatusarnermik Ataqatigiisaarisoq Najâraq Paniula saaffigalugu, oqarasuaat +299 34 57 50, faxi +299 32 31 71, email napa@nanoq.gl

Qinnuteqaat arfinilinngorlugu nassiunneqassaaq. Qinnuteqaat email imaluunniit faxi atorlugu nassiunneqartoq akuerineqassanngilaq.

Qinnuteqatit kingusinnerpaamik IIN-imiisapput 1. marts 2012

Qinnuteqaat uunga nassiunneqassaaq:
Ilinniartitaanermut, Ilisimatusarnermullu Naalakkersuisoqarfik, Box 1029, 3900 Nuuk nalunaaqqutserlugu

"Qinnuteqaat"