Ph.d.-Stipendium

Inuk ilisimatusartoq tassaavoq suliassaqarfimmik assersuutigalugu nappaatinut pissutaasartunik ilisimatusarnermut tunngatillugu misissuisoq imaluunniit oqaluttuarisaanermik allattukkanik ilisimatusartoq. Ilisimatusarneq tunngaviatigut tamanit suliarineqarsinnaavoq ilisimatusarfinnili kiisalu suliffeqarfinni assigiinngitsuni ingerlanneqakkajuttarluni.

Kalaallit Nunaanni ilisimatusarnermik ineriartortitsineq ilisimatusartussarsiortarnerlu nukittorsarniarlugit ukiumut pingasunik Ph.d.-mut ilisimatusarnersiutisiaqartitsisoqartarpoq. Ilisimatusarnersiutit ataatsimoorluni aningaasalersugaasarput ukuninnga Kommissionen for Videnskabelige Undersøgelser i Grønland, Forsknings- og Innovationsstyrelsen aamma Kalaallit Nunaanni Namminersorlutik Oqartussat. Ilisimatusarnersiuteqarfiit inuttalerneqarsinnaapput sulianut tunngatillugu suliassaqarfinni pingaarnerusuni tamani. Atugassanngortitsinermi Kalaallit Nunaanni suliassaqarfioreersunut attaveqarneq pingaartinneqartarpoq, qinnuteqartullu kalaallinut inuiaqatigiinnut taamatut attuumassuteqarnertik uppernarsarsinnaassavaat, ilisimatusarnersiutit Ph.d.-nngorniarnerullu ingerlanera aqqutigalugit Kalaallit Nunaanni tassungalu ilisimasanik piginnaasanillu annertusaanissaq nuussuinissarlu qulakkeerneqassapput. Annertunerusunik atuarusukkuit uaniipput Samfinansierede Ph.d. Stipendier.

Ilisimatusartut ilisimatusarnerup ineriartornerullu inuussutissarsiutinut tunngasortaannik paasisimasallit ilinniartinniarlugit, Kalaallit Nunaanni niuernermut, sanaartornermut suliffissuaqarnermullu ineriartortitsinissamut periarfissat siuarsarniarlugit taamatullu suliffeqarfiit aamma Kalaallit Nunaanni, Danmarkimi aamma/imaluunniit nunani allani ilisimatusarfiit akornanni ilisimasanik paarlaasseqatigiittarnerit annertusarniarlugit aamma kalaallini inuiaqatigiinni, suliffeqarfinni ilisimasanillu suliaqarfinni ilisimasat aalaakkaalersinniarlugit 2008-mi Inuussutissarsiutinut Ph.d.-mut ilisimatusartut marluk aallartisinneqarput. Taamaaliortoqarpoq GrønlandsBankens Erhvervsfondip aamma Kalaallit Nunaanni Namminersorlutik Oqartussat akornanni suleqatigiittoqarneratigut. Annertunerusunik atuarusukkuit uaniipput ErhvervsPh.d..