Ilisimatusarnermut allaffik

Kalaallit Nunaanni Namminersorlutik Oqartussat ilisimatusarnermut allaffiannut tikilluarit. Allaffiup inuttarai ilisimatusarnernik ataqatigiissaarisoq Najaaraq Paniula aamma ilisimatusarnernik ataqatigiissaarisoq Lone Nukaaraq Møller.

Ilisimatusarnermut Allaffik Ilinniartitaanermut Ilisimatusarnermullu Naalakkersuisoqarfiup ataani inissisimavoq ilisimatusarnermut ilisimatusarnermullu politikki suliassaqarfigalugit. Allaffiup suliassai tassaapput Naalakkersuisut Inatsisartullu siunnersussallugit kiisalu ilisimatusarnikkut ingerlatsinermi suliniuteqarfissanik siunnersuusiornerit suliarissallugit, suliffeqarfiit ilisimatusarnissamut pisussaaffeqartut suleqatigalugit isummersueqataassalluni.

Kalaallit Nunaanni ilisimatusarnikkut avatangiisit nukittorsarnerannut ilisimatusarnerullu siuarsarneranut allaffik peqataassaaq. Kalaallit Nunaanni ilisimatusarnikkut avatangiisit nukittorsarniarlugit attaveqarfigisanik piorsaaneq Ilisimatusarnermut Allaffiup tapersersorpai, ataatsimiinnernik ingerlatsinerit attaveqarfigisanullu suliniutit allat, kiisalu Kalaallit Nunaanni ilisimatusarnikkut akunnermiliulluni sulissussinerit.

Ilisimatusarneq siuarsarniarlugu Namminersorlutik Oqartussanit aningaasat agguagassat Ilisimatusarnermut Allaffiup aqutarai. Kalaallit ilisimatusarnikkut suliffeqarfiisa nukittorsarnissaannut aamma ilisimatusarnikkut iluarsartuullugit pilersaarusiat iluanni suliniuteqarfissatut Naalakkersuisut toqqagaasa aallartinneqarnerinut aningaasat agguagassat tapiissutaasarput.

Saniatigut ukiumoortumik Inuussutissarsiutinut Ph.d-mut aningaasat ikiorsiissutit kiisalu nalinginnaasumik Ph.d-mut aningaasat ikiorsiissutit pingasut pingasunik peqataasoqarluni Namminersorlutik Oqartussanit, KVGU-mit aamma Danmarkimi Forsknings- og Innovationsstyrelsimit suleqatigiinnissamut isumaqatigiissutit inuttassarsiuuttarpavut. Taakkua pillugit annertunerusumik paasissutissat quppernermi matumani pissarsiarineqarsinnaapput.

Allaffiup aamma suliassaraa Kalaallit Nunaanni innuttaasunut ilisimatusarneq pillugu ilisimasanik ingerlatseqqinnissaq. Tamanna tusagassiorfitsigut, TV radiulu aqqutigalugit ingerlaavartumik pisarpoq aamma “Ilisimatusartut naapiguk” aaqqissuussinikkut, saniatigullu naqitertinneqartartoq INUSSUK - Issittumi ilisimatusarneq pillugu nutaarsiassaqartitsivik kiisalu nutaarsiassat “Ilisimatusarnermut allaffik paasissutissiivoq” saqqummersittarpai.

Isumalioqatigiissitanut ataatsimiititalianullu Kalaallit Nunaanni ilisimatusarnikkut attuumassutilinnut suleqatigiissunut Namminersorlutik Oqartussanut Ilisimatusarnermut Allaffiup ilisimatusarnernik ataqatigiissaarisui sinniisuupput.

Paasissutissaqarnerorusukkuit attavigitigut. Attaveqarnikkut paasissutissiineq talerpia tungaaniippoq.