Meeqqerivitsialak

Ilinniartitaanermut Ilisimatusarnermullu Naalakkersuisup 26. april 2007 Meeqqerivitsialaap ingerlaqqeriarnissaanut tunngatillugu suliakkiissut atsiorpaa, taannalu tamarmi www.nanoq.gl -imi IIN-ip ataani takuneqarsinnaavoq.

Taamaalilluni suliap ingerlateqqinnissaa pingasunngorlugu avinneqarpoq: 1) inatsisitigut tunngavigisat iluasratuuteqqinnissaat 2) perorsaanikkut psykologiimullu tunngasutigut inerisaaneq ilisimatusarnerlu 3) ilinniartitaanerit iluarsartuuteqqinnissaat ilanngullugit isumaginninnermi tunngaviusumik ilinniarnerit, perorsaasunngorniarneq kiisalu ilinniaqqittarnerit.

Aallaqqaammut suleqatigiissitat marluk pilersinneqarput, tassaasut inatsisitigut tunngavigisanik ilinniarnerillu iluarsartuuteqqinnerinik suleqartussat, taakkulu siullermeerlutik 30. – 31. maj ataatsimiipput septemberimilu naapeqqissallutik.

Tamatuma tungaanut IIN-imi suleqatigiit meeqqat suli atualersimanngitsut pillugit nalunaarusiussapput, tamatumalu suliarinissaanut Agga Lund atorfinitsinneqarluni. Agga ukiorpassuarni meeqqanik suli atualinngitsunik suliaqartuuvoq perorsaasunngornianullu ilinniartitsisuulluni, aammattaaq suliap aallaaqqaataatungaani peqataasareerpoq, nunatasinni sumi tamaani isumasioqatigiilluni ataatsimiisitsisarnerit ingerlannerini. Taakkunannga paasisat naliliinermut ilanngunneqassapput.

Suliami pineqartumi meeraaqqerivinnut, meeqqerivinnut ulluuneranilu paaqqinniffinnut il.il. tunngatillugu kisitsisitigut paasissutissat katersorneqassapput, kommunit perorsaanikkut inerisaanerat paasiniaaffigineqassaaq il.il. suliarlu 15. oktober naammassereersimassalluni, taamaattorli aamma inerniliussaagallartut suleqatigiissitat sulineranni atorneqarumaarlutik.

Perorsaanikkut/psykologiimut tunngasutigut inerisaaneq ilisimatusarnerlu Ilisimatusarfimmi Ilinniaatsinut Institutimiit aallaaveqassaaq, tassani sulisut ukiuni arlalinni suliaqarnermikkut perorsaanikkut inerisaarnermik ilisimasaqarlualersimapput, ilaatigut nunarsuatta ilaani allami nunap inoqqaavisa akornanni ilisimatusarnikkut paasisat tunngavigalugit. Perorsaanermik Ilinniarfik peqataalissaaq perorsaanikkut inerisaanerup isumaginissaanut periarfissaqaleriartornertik ilutigalugu.

Perorsaanikkut tunngaviit inerisaqqinnerinik, ilisimatusarnermik, uppernarsaasersuinermik aamma perorsaasunik atuartitsisunillu ilinniartitseqqinnissamik aaqqissueqataasussatut professorimik atorfinitsitsisoqassaaq, suliniummik ingerlatsisut aamma Ilinniaatsinut Institutip ukioq tulliuttoq suleqatigisassaannik. Pineqartoq perorsaanikkut inerisaanermik, ilisimatusarnermik perorsaariaatsinillu sunniuteqarluartunik piviusunngortitsiniarnermik misilittagaqqortuujuvoq.

Inatsisiliorneq ilinniartitaanernillu iluarsartuusseqqilluni suliat ilimagineqarput 2008-mi ukiakkut naammassereersimassasut, tamannalu pitinnagu minnerpaamik isumasioqatigiinnerit nuna tamakkerlugu peqataaffigineqartut marluk suleqatigiillu ataatsimiinneri arlaqartut ingerlanneqareersimassapput, angajoqqaat suliamillu ilisimasaqartut aammattaaq tusarniaaffigineqartarumaarlutik.

Perorsaanikkut inerisaaneq ukiaru aallartisarneqassaaq, aallaqqaammut kommunini sisamani, annertusarneqartuassallunilu, nuna tamakkerlugu meeqqeriviit sulisuilu 2011-ip tungaanut ingerlatsinernut arlaqartunut peqataasarnissaat naatsorsuutigineqarluni.