Inuunermik nersorinninneq

2012-imi PAARISA Nuuk TV-mik suleqateqarnermigut INUUNEQ INUUFFIGIUK qulequtaralugu TV-kkut aallakaatitassiaaqqanik allagartarsuarnillu saqqummiivoq. Paasisitsiniaanerit taakku nangillugit illoqarfitsinni ilusilersuisartoq suleqatigalugu qarasaasiakkut postkortinik PAARISA sanatitsisimavoq.

Oqariartuutigineqarpoq ”Imminut toquttarneq unitsinneqarli”, taamaammallu pisariaqarpoq imminut toquttarnerup pinngitsoortinniarnissaanut ataatsimoornissarput. Inuuneq inuuffigiuk, sapilersimaguillu ikiorneqarsinnaavutit. Taamaammat ilisarisimasannut isumassuinermik qiimmassaanermillu pisariaqartitsisumut qarasaasiakkut postkortimik nassitsigit inummik taassuminnga asanninnerit takutinniarlugu.

Postkortit assigiinngitsunik arfinilinnik assiliartaqarput, taakkulu http://www.paarisa.gl aamma Facebook: Inuuneq inuuffigiuk / Lev livet aqqutigalugit aaneqarsinnaapput.

Ajoraluartumik siorna nunatsinni inuit 53-it imminut toqussimapput, taamaammallu paasisitsiniaaneq taanna aamma pingaaruteqarpoq. Ajornartorsiutivut pillugit ajornannginnerusumik oqaloqatigiissinnaalernissarput anguniarlugu oqariartuummik apuussiniarluta PAARISAmi ilungersuuteqarpugut. Tamatuma saniatigut inuit ajornartoortut ATTAVIK 146 aqqutigalugu kinaassutsimik isertuussiffiusumik oqarasuaatikkut akeqanngitsumik siunnersorneqarsinnaapput.

Imminut toquttarnerup pinaveersaartinnissaanut PAARISAp sulinerani aallaaviuvoq “Imminut toquttarnerup pinaveersaartinnissaanut iliuusissatut siunnersuut” 2004-meersoq. Iliuusissami tassani imminut toquttarnerup pinaveersaartinnissaanut siunnersuutit tigussaasut arlallit PAARISAp maanna piviusunngortiortugai saqqummiunneqarput.