Ivianngit qinnguartarlugit assiliinikkut nunatsinni misissuisitsisinnnaaneq

2010-mi ukiakkut Peqqissutsimut Naalakkersuisoqarfik Intasisartunut kræfti pillugu nassuiaammik tunniussivoq. Nassuiaammi tamatumani misissuisitsisarnissamut periarfissanik arlariinnik- ilaatigut qinnguartaalluni assiliinikkut ivianginik misissuisinnaaneq innersuussutaavoq. Kræfti pillugu pilersaarut 2013-imi upernaakkut tunniunneqassaaq.

Mammografi tassaavoq qinnguartartilluni misissortinneq nunatsinni periarfissaanngitsoq. Kalaallit Nunaanni arnat kingornuttakkamik iviangikkut kræfteqalersinnaasut qallunaat Nunaannut qinnguartatillutik misissortikkiartortarput.

Ullutsinni iviangimikkut kræfteqalersartut amerlanerpaajugaangamik ukiumut 15- usarput. Qallunaat Nunaanni arnat 50-ileereersut ukioq ataaseq allortarlugu qinnguartartillutik iviangiminnik misissortinnissaannut neqeroorfigineqartarput. Kalaallit Nunaanni arnat tamatuma assinganik neqeroorfigineqartussat 3.500-usussaassapput.

Misissuineq Nuummi qinnguartaanermut immikkoortortafimmi ingerlanneqartussaassaaq. Arnat 50-it sinnerlugit ukiullit 20 %-iisa missaannaat Nuummi najugaqartuupput. Sinneruttut 80 %-it Nuummut misissortikkiartortinneqartariaqassapput. Taamaasiornissarlu annertuumik aningaasartuutaasussaassalluni. Suliaq annertoorujussuussammat misissuinermi pilersaarusiornermilu sulisussat amerlingaatsiartariaqassapput.

”Iviangikkut kræfteqalersinnaanermut misissuisitsineq, nakorsaanissat allat akissaarullugit salliunniarneqannginnissaa, uannut pingaaruteqarpoq. Aningaasaqarnikkut suliassatigullu ajornakusoortussaassammat, iviangit qinnguartarlugit misissuisitsisarnerup iluaqutitai kingunerisassaalu misissorluaqqaartariaqarpagut”, Agathe Fontain nangilluni oqarpoq.

Qinnguartaalluni misissuinikkut iviangikkut kræfteqalersinnaanermik misissuisarneq tutsuiginavissuunngilaq. Arnaqarpoq misissortinnerminni kræftiusinnaasumik suussusaali qulakkeerneqarsinnaanngitsumik malussarfiusunik. Arnat taakku soorunami misissoteqqittariaqarput. Amerlasuut qujanartumik kræftimik nappaateqannginnerat paasineqassaaq, ataasiakkaalli iviangimikkut kræfteqartut qinnguartaalluni assiliinikkut paasineqanngitsuussapput.

”Iviangimikkut tinusumik malussartunut, tinuneq peersillugu misisugassanngortitsineq ullumikkut arnanut tamanut neqeroorutaavoq. ”Arnat iviangimikkut tinunermik malussartut neqeroorummut tamatumunnga innersuukkusuppakka”. Agathe Fontain naggasiivoq.