Naalakkersuisoq Agathe Fontain suleqatigiinnissamut isumaqatigiissummik atsiugaqarpoq

Naalakkersuisup Agathe Fontain-ip Europami avatangiisit pillugit suliniaqatigiiffimmi (European Environment Agency EEA) pisortaq ullumi København-imi ataatsimeeqatigiinnermi isumaqatigiissummik atsioqatigaa.

”Isumaqatigiissusiorneq Europami Kalaallit Nunaannilu avatangiisit peqqissutsimut sunniutaat qitiutillugu suleqatigiinnerulernissaannut allorianeruvoq siulleq.” taama oqarpoq Peqqissutsimut Naalakkersuisoq Agathe Fontain.

”Kalaallit Nunaanni avatangiisit peqqissutsimut sunniutaannut paasissutissanik katersinissaq avitseqatigiinnissarlu EEA-lu soqutigisaqaqatigiiffigaarput” Agathe Fontain nangippoq.

EEA tassaavoq avatangiisit pillugit suleqatigiiffik arlaannaannulluunniit attuumassuteqanngitsoq EU-mi maannamut nunanit 32-init, taakkunannga nunanit issittunit – Norge, Island, Danmark, Finland og Sverige-millu ilaasortaaffigineqartoq. Europami pisut Kalaallit Nunaannut nunanullu issittunut allanut taakkunanilu innuttaasut peqqissusaannut sunniuteqarsinnaanerat EEA-mit isumaqatigineqarpoq.

Isumaqatigiissusiornikkut Kalaallit Nunaat Europalu, avatangiisit innuttaasut peqqissusaannut sunniutaat ilaatigut mingutsitsinerup isorartuup silallu allanngornerata peqqissutsimut sunniutai pillugit, paasissutissanik avitseqatigiissinnanngorput. Isumaqatigiissusiornikkut misissuisitsinernit assigiinngitsunit paasissutissat kalaallisut tulullullu atuarneqarsinnaalernissaat qulakkeerneqarportaaq.

”Innuttaasunut peqqissutsikkut pitsaanerpaanik neqerooruteqarnissaq kissaatigaarput, taamaammat avatangiisit peqqissutsitsinnut sunniutaat pillugit EEA-mik suleqateqarsinnaaneq qujanarpoq. Avatangiisit silallu allanngornerata peqqissutsitsinnut sunniutaasa itinerusumik paasisaqarfiginissaannut paasissutissanik avitseqatigiittarnissaq pisariaqartipparput. Isumaqatigiissusiornikkut paasissutissanik avitseqatigiissinnaanermut paasiniaaqqissaarsinnaanermullu periarfissaq annertusissaaq,” Agathe Fontain naggasiivoq.