Atuaqatigiit pujortartuunngitsut 2011-imi toqqarneqarput

Ukkusissani Atuarfik Pilerfik-mi akullerni atuaqatigiiaat, PAARISAp atuaqatigiinnut pujortartuunngitsunut unammisitsinerani ajugaapput.

Atuaqatigiit pujortartuunngitsutut taaguutip toqqagaassutiginerata saniatigut akissarsiarivaat 30.000 kruunit.

5. – 7. klassini atuartut nuna tamakkerlugu periarfissaqarsimapput unammisitsinermut Atuaqatigiit Pujortartuunngitsut 2011-imut peqataanissaminnut. 2011-mi ajugaaniunnermi pingaarnerpaatut suliassaasimavoq inunnik amerlanerpaanik pujortarunnaarsitsiniarluni suliniuteqarnissaq. Makkualu peqataanissamut piumasaqaataasimapput:

Atuaqatigiinnut peqataaniartunut piumasaqaatit pingasuupput:

• Atuaqatigiit akornanni pujortartoqarsimappat, taakku pujortartartut unammitsitsinerup naammassinerani tamarmik pujortartarunnaarsimassapput.
• Pujortarunnaarsitsiniarlutik suliai nalunaarusiorneqassapput. Nalunaarusiornikkut allaaserineqassaaq qanoq iliorluni pujortarunnaarsitsiniaaneq ingerlanneqarnersoq.
• Pujortarunnaarsinneqartut uppernarsaassapput ilumut pujortarunnaarsimallutik. Taamaliorsinnaapput naatsumik pujortarunnaarnertik uppernarsarlugu allallutik imaluunniit assilitillutik atsiorlutillu imaluunniit naatsumik videomut immiutsillutik.

Atuarfik Pilerfik-mi akullerni atuaqatigiiaat ajugaatinneqarput imatut tunngavilersorneqartumik:

Atuaqatigiiaat akullerniittut tamarmik pujortartuunngillat aammalu unammisitsinermi tun-ngaviusumik piumasaqaataasut naammassineqarsimallutik.

Unammisitsinermi siunertarineqartoq eqqarsaatigilluakkamik erseqqissumillu pilersaarusiorneqarlunilu anguniagassiorneqarsimavoq. Nalunaarusiaq atuaruminartumik paasiuminartumillu iluseqarlunilu allaaserineqarsimavoq.

Atuaqatigiit iliuuserisimasaasa assigiinngiiaartuuneri ataqatigiinnerilu maluginiarneqarput, suliniutinilu kikkut qanorlu anguniarneqartussaaneri atuaqatigiit ajornartoortaraluarlutik uniinnaratik allanik periarfissarsiornikkut aallarteqqittarsimavaat.

Atuaqatigiit iluminni pujortartarnerup peqqinnissakkut ulorianartuunera ilinniutitut sammisimavaat ilisimalikkatillu avatangiisiminnut assigiinngitsutigut siammarsarsimallugit, kiisalu pujortartarunnaarsaanissamut periaasissanik ujartuinermikkut periarfissiisimallutik.

Atuaqatigiit piareersarluarsimanerminni iliuuseqarnermigullu piviusunngortitsisarnerminni atuarfimmi avatangiisaasut aamma nunaqarfimmi innuttaasut, angajoqqaat qatanngutillu ilaatilluarsimavaat.

2011-mi atuaqatigiit katillugit 11-t unammisitsinermi peqataaniarlutik nalunaarsimapput, taamalu atuaqatigiit 4-t unammisitsinermi nalunaarusianik unammissutaasussanik taamaallaat nassitsisimallutik.

Atuaqatigiit arlaqartut unammisitsinermut peqataanertik taamaatiinnartariaqarsimavaat pilersaarutigisaasa allannguuteqarnerannik aammalu unammisitsinermi suliniutit ingerlannerannut piumassusikippallaarnerit peqqutigalugit soorlu aamma atuaqatigiit akornanni suli pujortartartoqarsimammat.