Kalaallit Nunaanni Peqqinnissaqarfik MR-scannerimik tunissuteqarfigineqartoq

Kalaallit Nunaanni Peqqinnissaqarfiup MR scannerimik (magnetisk resonans scanning) peqalernissaa qa­ngali kissaataasoq aningaasaateqarfimmit Candys Foundation-imit ani­ngaasaliiffigineqarnikkut piviusunngorpoq!

MR-scannereqalernikkut CT-scannereqareernikkullu qinnguartaanermi assiliilluni nappaatinik suussusersiniaanermi Kalaallit Nunaanni Peqqinnissaqarfik atortorissaarnernut ilanngutissaaq.

MR-scanneri atorlugu misissuinermi timip sananeqaatai atortuilu ersarissumik taku­neqarsinnaalissapput, taamatuttaarlu nappaatit suussusersiniarnerini piaartumillu nakorsartissinnaanermut annertuumik iluaqutaassalluni.

2012-imi ukiakkut MR scanneri Dronning Ingridip Napparsimmavissuani atorneqarsinnaalerpat Qallunaat Nunaannut misissortikkiartornissaq pisariaarutissaaq. Napparsimasut amerlanerusut misissortissinnaalissapput nunatsinnilu nakorsartittussanut tamanna annertuumik siuariaataassaaq.

MR scanneri atorlugu misissuisinnaalernissaq qangali piareersarneqarpoq. 2002-mili Napparsimmavissuup qinnguartaaveqarfissaa nutaaq suliarineqalermat MR scannerip inissaa inniminnerneqareerpoq, taamaammat sanaartornikkut annikitsuinnarmik allannguisoqartariaqassaaq.

Aningaasaateqarfik Candys Foundation ilaqutariinnit pigineqartoq peqqinnissaqarfinnut, ilaatigut Herlevip Napparsimmavianut, napparsimmavissuarmut Rigshospitalimut Slagelsemilu napparsimmavimmut aningaasaliissuteqareersimavoq. MR-scannerimut ani­ngaasaliissutinut ilaatigut ilaapput inissiffissaata allanngortinnissaanut aningaasartuutissat, sulisunik ilinniartitsineq atortussaasalu ilassaat.

”MR-scanneri nappaatinik suussusersiniaanermi atortuuvoq naliitsoq, nappaammik eqqoqqissaartumik suussusersisinnaanerup saniatigut nunatsinni nakorsartinnissamut periarfissiisoq. Uanga tamanna nuannaarutigeqaara, nalunnginnakkumi ilungersunartorsiornermi qanigisat najornissaat qanoq pingaartigisoq ”Agathe Fontain taama oqaaseqaateqarpoq.

MR-canneri, tonsinik arlalinnik oqimaassusilik Hitachimit Japanimiittumit inniminnerneqarpoq, umiarsuakkullu tikiunneqassalluni. Taamaammat qaammatit arlallit qaa­ngiuppata aatsaat inissinneqarluni atorsinnaalissaaq. MR-scannerip ukiup naalernerani atorneqarsinnaalernissaa naatsorsuutigineqarpoq.