Kræfti qitiutillugu

Naalakkersuisup Agathe Fontainip, sapaatip akunnerata siuliani sisamanngornermi isummersoqatigiinnermi Inatsisartut Ilaqutariinnermut Peqqissutsimullu Ataatsimii­tita­li­aannit peqqinnissaqarfimmilu ilisimasalinnit peqataaffigineqartumi, ”Kræfti pillugu nassuiaat 2011” saqqummiuppaa.

Agathe Fontain ataatsimiinneq aallarnerlugu ima oqaaseqarpoq: ”Kræftimut tunngatil­lu­gu majuartarfiit qummukarfissatta naqqanut pivugut. Kræfti pillugu nassuiaat qum­mut alloriarneruvoq siulleq, tulliupporlu kræfti pillugu pilersaarusiornissaq. Qummut tum­meqqat majuarfissat tassaassapput iluarsartuussinerit, allannguinerit nutaanillu pilersaa­rusiornerit.”

Kræfti pillugu nassuiaammi maannamut pitsaaliuinermi, nappaammik suussusersiniaa­nermi, nakorsaanermi, peqqissaanermi, piginnaanngorsaaqqinnermi anniaatikillisaa­nermilu neqeroorutaasut killiffiat ersersinneqarpoq. Taamaammat Agathe Fontainip Inatsisartut Ilaqutariinnermut Peqqissutsimullu Ataatsimiititaliaat saqqummiiviginiarlugu kræftilu pillugu pilersaarusiornissamut ingerlariaqqinnissaq pillugu oqalliseqatiginiarlugu aggersarpaa.

”Peqqinnissaqarfiup kræftimik suussusersisinnaassusaa nakorsaasinnaassusaalu peq­qin­nis­saqarfiup qanoq ingerlalluartigineranut ersiutitut innuttaasunit nalilerneqartarpoq”, Agathe Fontain oqarpoq.

Amerlaqaat kræftimik eqqorneqartartut. Taamaammat Ilaqutariinnermut Peqqis­sut­si­mul­lu Ataatsimiititaliap isumasioqatigiinnermut kræftimik nappaateqartut pitsaanerusumik ataqatigiissaarluakkamillu nakorsarneqarnissaannik qitiutitsisumut peqataanissaa pi­ngaa­ruteqarpoq.

”Pitsaaliuineq kræftimik akiuiniarnermi annertuumik pingaaruteqarpoq. Ukiut 30-t ingerlaneranni 2005-imiit 2009-mut puakkut kræfteqalersartut aatsaat siullermik ikile­ri­a­laarnerat takuarput. Taamaa pitsaasumik ineriartortoqaannarnissaa neriuutiginiartigu. MR scannerilu atorneqalerpat taanna napaammik suussusersiniaanermut malittarin­ninnermullu annertuumik sunniuteqassaaq” Agathe Fontain naggasiivoq.