Peqqissuserput - naatsumik oqaatigalugu

Kalaallit Nunaanni peqqissutsimut tunngasunik paasisaqarnerorusuttunut ilisimatusarnikkulli nalunaarusianik annertuunik atuarnissamik merserusuttunut nutaarsiassaqalerpoq. Innuttaasut peqqissusaannik 2005-2009-mut misissuinerup inerneri pillugit nalunaarusiaq tamanut atuaruminarsagaq saqqummerpoq.

Nalunaarusiaq Kalaallit Nunaanni innuttaasut peqqissusaat pillugu paasisaqarnerorusuttunut tamanut tunngatinneqartoq, innuttaasunik misissuinerit annertuut 1993-imiilli ingerlanneqartut pingajussaraat.

Innuttaasunik misissuinermi peqqinnissaqarfimmik atuisuinnaanngitsut, innuttaasulli kik-kuugaluit inuunerminni peqqissutsimikkut ajornartorsiutiminnik oqariartuuteqarput. Inersimasut 2.971 illoqarfinnit 8-nit nunaqarfinnillu 10-neersut misissorneqarput apeqqarissaarfigineqarlutillu. Kalaallit Nunaanni innuttaasut ileqqui peqqissutsimut attuumassutillit, inooriaasaat, peqqissusaat namminnerlu peqqissutsiminnik naliliinerat misissuinermi paasiniarneqarput.

Innuttaasut peqqissusaat siuliini misissuisarnernut sanilliullugu naliliivigineqarpoq.

Innuttaasut namminneq peqqissutsiminnik naliliinerisa 1993-imiit ajornerulersimanera, peqqinnanngitsunik nerisaqalersimaneq peqqinnissaqarfimmillu sullinneqarnerup iluarineqarnerulernera ilaatigut atuarneqarsinnaapput.

Nalunaarusiaq atuaruminarsarlugu naalisagaq: ”Atugassarititat, inooriaaseq peqqinnerlu – 2005-2009-mut Kalaallit Nunaanni innuttaasunik misissuisitsineq” nittartakkami www.peqqik.gl-imi atuarneqarsinnaavoq, pisiarineqarsinaavortaarlu Peqqissutsimut Naalakkersuisoqarfimmut imal. Statens Institut for Folkesundhed-imut saaffiginninnikkut.

Innuttaasunik misissuisitsineq namminersortunit pisortanillu annertuumik aningaasaliiffigineqarnikkut, Karen Elise Jensen-ip aningaasaateqarfia annertunerpaamik aningaasaliisoralugu ingerlanneqarpoq.