Agathe Fontainip Peqqinnissaqarfimmi aqutsisut ataatsimeeqatigiinneranni oqalugiaataa

31. august 2010, Peqqissutsimut Naalakkersuisoq Agathe Fontain.

Tikilluaritsi!

Nuannaarutigeqaara nunatsinni Peqqinnissaqarfimmi aqutsisut sulisullu qulliunerusut ataatsimeeqatigiinnissaannut tikilluaqqusinnaagassi.

Aqutsisut ataatsimeeqatigiinnissaannut pilersaarut soqutigalugu atuarsimavara, takusimallugillu ullormut oqaluuserisassani sammisassat soqutiginartorpassuit maannakkorpiarlu pisut, taakkualu amerlanersaanni Peqqinnissaqarfiup aaqqissuuteqqinneqarnera 2011-mi atuutilersussaq sam­mineqartoq. Qilanaarpunga sammisanut taakkununnga pingaaruteqartunut isumassarsiasi tusassallugit.

Peqqinnissaqarfiup aaqqissuuteqqinneqarnerani sulineq aallartinneqarpoq nassuiaat Inatsisartunut 2007-imi saqqummiunneqartoq kingornatigullu oqallisigineqartoq tunngavigalugu.

Naalakkersuisuni qularutiginngilluinnarparput Peqqinnissaqarfiup aaqqissuuteqqinneqarnera pisariaqartuusoq, tunngaviusussarlu peqqinnissaqarfiup siunissami, aamma ullutsinnut naleqquttumik, kiffartuussisinnaanissaanut. Peqqinnissaqarfiup aaqqissuuteqqinneqarnerani Peqqinnissaqarfimmi unamminartut isumagineqassapput, peqataaqataassallutillu Peqqinnissaqarfiup aamma siunissami pisussaaffimminik eqquutitsisinnaanissaanut.

Peqqinnissaqarfiup aaqqissuuteqqinneqarnerani piffissaq atuutilersitsiviusussaq 2011 oqallisigineqarsinnaanngilaq. Soorunami pisariaqassaaq ingerlaavartumik iluarsiisoqartarnissaa naleqqussaasoqartarnissaalu, taamaattumillu aatsaat tamakkiisumik atuutilivissutut isigineqarsinnaassalluni 2013-ip upernaavani. Ilisimavara tamassinnut annertuunik piumasaqaateqarfiusoq, piffissamili inuiaqatigiit aningaasaqarniarnerisigut, pingaartumillu sinerissap sinnerani peqqinnissaqarfinni sulisussaqarniarnikkut, annertuumik tatineqarfiusumi tamatta allanngortitsinissamut piareersimasariaqartugut.

Ilisimavara ukiuni qaangiuttuni nunap immikkoortuinut agguataarinerup inerisarneqarnerani annertuunik suliaqartoqarsimasoq, piffissamilu kingullermi misiligaalluni suliaqarneq.

Neriuutigaara misiligutaasumik annertuunik suliaqarsimanerit peqqinnissaqarfiit sinnerisa pissarsiaqaatigiumaaraat, maannakkummi taakku aamma nunap immikkoortuini aqutsisoqarnermut 2011-miit nuuttussaammata. Aqutsisut ataatsimeeqatigiinnissaannut pilersaarummi ersarilluinnartumik takuneqarsinnaavoq Peqqinnissaqarfimmi aaqqissuusseqqinneq tullinnguuttumillu aaqqissuussaanikkut allanngortitsinissat sammineqartussaasut. Qilanaarpunga Peqqinnissaqarfiup siunissami nunap immikkoortuinut agguataarneqarnissaanut misilittakkat oqallinnerillu tusagaqarfiginissaannut.

Peqqinnissaqarfik annertoqisumik tatineqarsimavoq. Taama tatisimaneqarneq ilissi ulluinnassinni, Peqqinnissaqarfiup aqutsisoqarfiani, Naalakkersuisoqarfimmi aamma uagutsinni politikerini malugineqarsinnaavoq.

Unamminartut annertuut ilagaat innuttaasunut peqqissuunermik sapinngisamik annertunerpaamik tunniussinissaq aningaasaqarniarnikkut sinaakkusiussat iluini. Annertuumik unamminartuuvoq aningaasaqarniarnikkut atugassarisavut ukiut tamaasa aningaasanut inatsisikkut aningaasaliissutigineqartartut peqqinnissaqarfiup ingerlanneqarneranut oqimaaqatigiissinniassallugit. Tamanna tunngavigalugu Peqqissutsimut Naalakkersuisoqarfik Peqqinnissaqarfillu 2009-mi suliniuteqarput nunatsinni Peqqinnissaqarfiup arlaannaannulluunniit attuumassuteqanngitsumit aningaasaqarniarnikkut aaqqissuussaanikkullu misissueqqissaarfigineqarnissaanik.

Taamatut attuumassuteqanngitsumit misissuinermi Deloitte-kkunnit isumagineqartumi periutsit pingasut tikkuarneqarput aningaasartuutit annertusiartuinnartut akiorniarnissaannut:

· Aningaasanik amerlanerusunik aningaasaliiffigineqarneq

· Suliaqarnerulernikkut aaqqissuusseqqinnertigullu – soorlu Peqqinnissaqarfiup aaqqissuuteqqinneqarneratigut – Peqqinnissaqarfimmit pimoorussinerulernerit

· Naalakkersuinikkut sukannernerusumik pingaarnersiuinerit

Uagut politikeriusugut, Peqqinnissaqarfimmi aqutsisut sulisullu maanna isumaginiartussaassavarput kaammattuutit napparsimasunut nuannaarutaasumik piviusunngortinnissaat.

Nalunaarusiami inerniliineq 2011-mut Aningaasanut Inatsimmut saqqummiussaqartitsereerpoq, tassani naalakkersuinikkut anguniarneqarluni Peqqinnissaqarfimmi aningaasaqarniarnikkut sinaakkusiussat annertunerulersinnissaat.

Nalunaarusiami inerniliineq alla unaavoq Peqqinnissaqarfimmi aaqqissuusseqqittoqassasoq, tassanilu pissusissamisoorluinnarpoq Peqqinnissaqarfimmi aaqqissuusseqqinneq eqqaassallugu.

Naalakkersuisuni annertuumik pingaartipparput innuttaasup pisortanut attaveqarnermini pitsaasumik misigisaqartarnissaa. Ukiumi siullermi Peqqissutsimut Naalakkersuisutut piffissap ilaa atorsimavara nuna tamakkerlugu angalanernut, Peqqinnissaqarfiit summiikkaluartulluunniit takuniarlugit, aammali Peqqinnissaqarfimmut Peqqinnissaqarfimmillu sullississutaasartunut tunngatillugit innuttaasut naatsorsuutigisaat misigisaallu paasisaqarfiginiarlugit.

Misigisimasara unaavoq, innuttaasut amerlaqisut Peqqinnissaqarfimmut saaffiginnikkaangamik tikilluaqqusaanngitsutut misigisaqartarnerat. Itigartinneqartutut pitsaanngitsumilluunniit kiffartuunneqartutut misigisarput. Qularutiginngilluinnarpara peqqinnissaqarfimmit sullississutaasartut pitsaalluinnartuummata, kisianni immaqa pikkoriffiginngilarput uagut naatsorsuutigisavut innuttaasut naatsorsuutigisaannut oqimaaqatigiississallugit. Pitsaasumik attaveqatigiittarneq kiffartuussinerlu sammineqassapput. Pissutsit tamakku aaqqinneqarsinnaagajupput sulisut tikilluaqquserpalaartumik, tusarnaarluarlutik aammalu isumaqatigiissutinik malitseqartitsillutik pissuseqarnerisigut. Neriuutigaara tamanna allanngortinniarlugu ilissi aqutsisutut anguniagaqarumaartusi.

Taamatuttaaq illoqarfinni aammali nunaqarfinni tunngaviulluinnartumik ilisimasaqarfigerusutat, soorlu eqqiluisaarneq aamma peqqinnartunik nerisaqarneq inooriaaseqarnerlu, tusarfigissallugit annertuumik soqutiginninneq misigisimavara. Maani najuuttugut tamatta ilisimavarput pinaveersaartitsinikkut paasisitsiniaanikkullu annertuumik pissarsiaqarsinnaalluta. Taamaattumik neriuppunga peqqinnartumik inooriaaseqarnerup pinaveersaartitsinerullu Peqqinnissaqarfimmi siunissami sammineqarnerulernerisigut innuttaasut tunngaviulluinnartunik ilisimasaqarfigerusullugit taama soqutiginninnerat iluaqutiginiarneqarumaartoq.

Naggasiutigalugu ulluinnarni sulinissinnut aamma Peqqinnissaqarfiup aaqqissuuteqqinneqarnissaanut maanna ingerlanneqartumut tunngatillugu qutsaveqarfigerusuppassi. Tamassi immikkut annertuunik suliaqarpusi, naak amerlasuunik unammisassaqaraluarluta, ulluinnarni sulinivut ingerlasinnaatippasi.

Qujanaq tusarnaarluarnissinnut. Qilanaarpunga ullunut pissanganartunut, tamatsinnullu pitsaasumik pissarsiaqarfiulluartumillu suleqatigiittuarnissatsinnut!

Ataatsimeeqatigiilluarisi!