Imigassamik ajornartorsiutilinnik katsorsaasarneq oqallisigineqarluarpoq

Namminersorlutik Oqartussat, KANUKOKA kommunillu siunissami katsorsaasarnissap aaqqisuunneqarnissaa - aningaasartuutissat eqqaassanngikkaanni - tunngaviatigut isumaqatigiissutigaat. Katsorsaasarnerup kommuninut tunniunneqarnissaanut alloriarneq tulleq tassaassaaq, tunniussinissap tungaanut suleqatigiissitamik qanoq pisoqarnissaanik pilersaarusiortussamik pilersitsineq.

Imigassamik ajornartorsiuteqartunik katsorsaasarneq pillugu ataatsimiisitsineq Nuummi aggustip 18-ani 19-anilu 2010 ingerlanneqartoq, katsorsaaviit kommuninit tiguneqarnis-saat pillugu oqaloqatigiinnermik pilersitsivoq. Ullut marluk ataatsimiinneq Namminersor-lutik Oqartussanit KANUKOKA-mit kommuninillu peqataaffigineqartoq, isumassar-siviusunik saqqummiussiviullunilu eqimattakkuutaarluni suleqatigiiffiuvoq.

- Susassaqarfiup tamatuma kommuninut tunniunneqarnissaani, akisussaaffiup aningaasartuutillu kisimik apeqquttaannginnerat, imigassamik ajornartorsiutilinnik katsorsaasarneq pillugu ataatsimiinnerup takutippaa. Katsorsaaviit kommuninut nuunneqarnerini innuttaasunik kiffartuussinerup ataqatigiinnerusup anguneqarsinnaanissaa, ataatsimiinnermi inerniliineruvoq pingaarutilik, Peqqissutsimmut Naalakkerusisoqarfiup pisortaa Ann Birkekær Kjeldsen oqarpoq.

Siunissami katsorsaasarnissamut tunngassutillit arlaqartut, amerlanernit isumaqataaffi-gineqarnerat erserpoq. Innuttaasut pisariaqartitaannut naleqqussakkat assigiinngitsut neqeroorutaasinnaalernissaat, peqataasut ilaatigut isumaqatigiissutigaat. Siunissami katsorsaanerup qitiusumik siammasissumillu neqeroorutaasinnaanissaa - taamatullu katsorsaaviit kommuninut tunniutinnginnerini, katsorsaariaatsip atuuttup qulaajaavigalugulu naliliivigineqarnissaa isumaqatigiissutaavortaaq.

Katsorsaasarnerup kommuninut tunniunneqarnissaanut alloriarneq tulleq tassaassaaq, tunniussinissap tungaanut qanoq pisoqarnissaanik pilersaarusiortussamik, Namminersorlutik Oqartussanit KANUKOKA-mit kommuninillu peqataaffigineqartumik suleqatigiissitaliornissaq. Suleqatigiissitaq katsorsaavinnik tigusinissamut atatillugu politikerinit aalajangiivigineqartussamik pilersaarusiussaaq.