Agathe Fontain ikiaroornartoq pillugu isumasioqatigiittuni peqataavoq

Peqqissutsimut Naalakkersuisoq Agathe Fontain aggustip 23-anniit 27-annut 2010 Ilulis-saniinnermini, Nunani Avannarlerni ikiaroornartoq pillugu isumasioqatigiit ataatsimiinner-anni peqataanermi saniatigut, peqqinnissaqarfimmik aaqqissuusseqqinnissaq pillugu innuttaasunik ataatsimiisitsissaaq Qaasuitsullu Kommunia ataatsimeeqatigissallugu.

Agathe Fontain ataasinngorneq aggustip 23-anni 2010 Qaasuitsup Kommuniani politikerinik atorfilittanillu ataatsimeeqateqassaaq. Qaanaaq Kommitiip sulinerata nanginneqarnissaanut pilersaarusiornissaq, meeqqat inuusuttullu suliniuteqarfigineqarnerannut tunngasut imigassamillu ajornartorsiutillinnik katsorsaasarnerup killiffianik nalilineq, ataatsimiinnermi oqaluuserisassat pingaarutillit ilagaat. Qaasuitsup Kommuniata Qaanaami pinaveersaartitsinermut ataatsimiititaliaq suleqatigalugu suliamik nangitsinissaa isumaqatigiissutaavoq.

Agathe Fontain marlunngorneq aggustip 24-anni 2010 Namminersorlutik Oqartussat sinnerlugit danskit siulittaasoqarfiat peqatigalugu, Nunani Avannarlerni ikiaroornartoq pillugu isumasioqatigiit ataatsimiinnissaannut tikilluaqqusissaaq. Agathe Fontain-ip ataatsimiinnermi Naalakkersuisut aanngajaarniutit pillugit politikkiat saqqummiutissavaa PAARISA-lu nuna tamakkerlugu pinaveersaartitsineq pillugu paasissutissiissalluni.

- Naalakkersuisut aanngajaarniutit pillugit politikkiat peqqinnartumik inooriaaseqarnissap inuunermilu atugassarititaasut pitsaasuunissaannik suliniuteqarusunnermik tunngaveqarpoq. Aanngajaarniutit pillugit politikkip toqqammavii pingasut tassaapput:

inatsisiliorneq, katsorsaaneq pinaveesaartitsinerlu. Naalakkersuisut Nunani Avannarlerni suleqatigiinneq pingaarteqaat ataatsimiinnermilu misilittakkanik paarlaasseqatigiinnissaq qilanaaraara , peqqissutsimut Naalakkersuisoq Agathe Fontain taama oqaaseqarpoq.

Agathe Fontain peqqinnissaqarfiup aaqqissuuteqqinneqarnissaa pillugu sisamanngor-neq aggusip 26-anni nal. 19.30-21.30 innuttaasunik ataatsimiisitsissaaq Ilulissat kulturikkut illuanni Sermermiuni.

- Peqqinnissaqarfiup aaqqissuuteqqinneqarnissaanut suliniuteqarnerup sapinngisamik tamanut ammasumik ingerlanneqarnissaa kissaatigaara. Taamaattumik nuna tamakker-lugu innuttaasunik peqqinnissaqarfimmilu sulisunik ataatsimiisitsinerit ingerlappakka, Peqqissutsimut Naalakkersuisoq Agathe Fontain naggasiivoq.