Imigassamik ajornartorsiutilinnik katsorsaasarneq oqaloqatigiissutigalugu

Imigassamik ajornartorsiutilinnik katsorsaasarneq pillugu Peqqissutsimut Naalakkersuisoqarfik aggustip 18-iani 19-ianilu 2010 Nuummi ataatsimiisitsissaaq. KANUKOKA, kommunit Namminersorlutillu Oqartussat oqaloqatigiinnikkut, katsorsaaviit kommuninut nuunneqarnissaannut isumaqatigiissusiornissaat ataatsimiinnermi siunertaavoq.

Kommuninik iluarsaaqqinnermut atatillugu imigassamik ajornartorsiuteqartunut katsorsaasarneq, Namminersorlutik Oqartussat oqartussaaffiisa kommuninut nuutassat ilagaat. Imigassamik ajornartorsiutilinnik katsorsaasarnerup kommuninit tiguneqarnissaa, kommunit katsorsaavinnik ingerlatsinissamik kissaateqarnerannik naapitsiniarneruvoq.

- Pisortat innuttaasunik sullissinerminni innuttaasunut qanittumik inissisimasut sullissinissaat Naalakkersuisut anguniagariuarpaat. Tamatumanissaaq pineqarluni imigassamik ajornartorsiutilinnik katsorsaaneq, Peqqissutsimut naalakkersuisoq Agathe Fontain oqarpoq, nangillunilu: - Taamaattumik sammisaqartitsinerup KANUKOKA-mit, kommuninit Peqqissutsimullu Naalakkersuisoqarfimmit peqataaffigineqartumik, susassaqarfimmik nuussinermi atugassarititaasut toqqammavissallu pillugit saqquumiisussamik, suleqatigiissitamik pilersitsinermik kinguneqarumaarnissaa kissaatigaara, Peqqissutsimut Naalakkersuisoq Agathe Fontain naggasiivoq.

Isumasioqatigiinnermi imigassamik ajornartorsiuteqarneq pillugu Kalaallit Nunaanni imigassap ajornartorsiutaanera aallaavigalugu saqqummiussisoqassaaq, nunatsinni ullumikkut katsorsaariaaseq, katsorsaasut ilinniartitaanerat, katsorsaariaatsit aammalu Danmarkimi katsorsaasarnerup kommuninit tiguneqarnerani misilittakkat pillugit saqqummiisoqassalluni.

Ataatsimiinneq naammassiniariarpat peqataasut Kalaallit Nunaanni imigassamik ajornartorsiutilinnik siunissami katsorsaariaasissaq oqallisigissavaat, imigassamillu ajornartorsiutilinnik katsorsaasarnermik nuussinissamut alloriarnissat tulliuttut isumaqatigiissutigalugit.