ATTAVIK 146 2009-mut nalilersuivoq

2009-mi ATTAVIK 146 telefonikkut siunnersuisarfik 194-inik oqaloqateqarsimavoq, 2008-mut sanilliullugit amerleriarput. Kiserliorneq atornerluinermillu ajornartorsiutit oqaloqatigiinnerni suli oqaloqatigiissutaanerpaapput.

Attavik 146-mi siunertaavoq kinaassuseq isertuullugu akeqanngitsumillu inuit imminut toqunnissaminnut eqqarsartunut inuttulluunniit ajornartorsiortut siunnersorneqarnissamik neqeroorfiginissaat. Attavik 146 aamma inuit imminut toqunnissaminnut siorasaarisimasut qanigisaannut saaffiginnippoq.

2009-mut ukiumoortumik kisitsinerit takutippaat, siunnersuilluni oqaloqateqartarnermi kiserliorneq, atornerluinermik ajornartorsiutit pisimasullu quarsaarnartut, soorlu timikkut persuttarneqarneq tarnikkullu mittataaneq oqaloqatigiissutigineqarnerpaasarsimasut. Taamaalilluni 2009-mi ajornartorsiutit sammineqarnersaat 2008-mi siunnersuilluni oqaloqatigiissutigineqarnerpaasimasut assingaat.

2009-mi ATTAVIK 146-mi oqaloqatigineqartuni tamarmiusuni imminut toqunnerit imminullu toqoriarnerit affaat inorlugit nalunaarsorneqarsimapput. Quarsaarnartunik misigisaqarsimasut soorlu persuttartissimasut pinngitsaalineqarsimasulluunniit imminut toquttartuni imminullu toqoriartartuni soorluuna amerlanerpaasut.

2009-mi ATTAVIK 146-mut sianertut 68 %-ii arnaapput. Siunnersorneqarnissaminnut saaffiginnittut tamarmiusut pingajorarterutaat 20-t 29-illu akornanni ukioqarput, sisamararterutaallu 40-t 49-llu akornanni ukioqarlutik.

Inuit siunnersorneqarnissaminnik saaffiginnittut 38 %-ii Qaasuitsup kommunianinngaanneersuupput, 31 %-ii Kommuneqarfik Sermersuuminngaanneersuullutik, 21%-ii Kommuneqarfik Kujallermeersuupput 10 %-iilu Qeqqata Kommunianeersuullutik. Oqaloqatigineqartut 86 %-ii illoqarfinninngaanneersuupput sinnerilu 14 %-ii nunaqarfinninngaanneersuullutik. Taamaalilluni inuit illoqarfinninngaanneersut suli amerlanerusut ATTAVIK 146-mut siunnersorneqarnissaminnut saaffiginnissimapput.

ATTAVIK 146 pillugu kisitsinerit www.paarisa.gl -imi atuarneqarsinnaapput.

ATTAVIK 146 ataasinngornermiit pingasunngornermut nal. 19 – 22-mut ammasarpoq.