Naartusunut suliniuteqarneq pillugu suleqatigiinnissamik isumaqatigiissut

Peqqissutsimut Naalakkersuisoqarfik, Isumaginninnermut Naalakkersuisoqarfik aamma PAARISA suliniutit pingasut pillugit suleqatigiinnissamik isumaqatigiissuteqarput: Ilaqutariinnut naartusortalinnut siusinaartumik iliuuseqarneq, Qitornartaarnissamut piareersimaneq aamma Inuusamik paaqqutaqartarneq.

-Misilittakkat paasinarsisippaat oqartussaasut assigiinngitsut akornanni pinaveersaartitsiniarluni suleqatigiikkaangatta angusaqarluartartugut. Taamaattumik naartusarneq angajoqqaajunerlu pillugit suliniutit pingasut pingaarutillit pillugit peqqissutsimik suliassaqarfiup isumaginninnermilu suliassaqarfiup akornanni suleqatigiinnerup pisortatigoortumik suleqatigiinnissamik isumaqatigiissuteqarnerput naammagisimaartorujussuuara, Peqqissutsimut Naalakkersuisoq, Agathe Fontain oqarpoq.

Ilaqutariinnut naartusortalinnut siusinaartumik iliuuseqarneq nuna tamakkerlugu suliniutaavoq ilaqutariinnut naartusortalinnut immikkut tapersersorneqarnissamik pisariaqartitsisunut tapersersuiffiusoq. Sumiginnaanissap pinaveersaartinneqarnissaa suliniummi anguniagaavoq.

Qitornartaarnissamut piareersimaneq angajoqqaanik pikkorissartitsineruvoq perorsaanermut, inooqataanikkut attaveqaatit aammalu angajoqqaat meeqqamut misigissutsikkut peqqinnartumik atassuteqalernissaannut tunngatillugu angajoqqaanngortussat piginnaasaannik nukittorsaaqataaffiusussaq, taamaaliornikkut angajoqqaat pitsaanngitsumik iliuuseqarsinnaanerat, soorlu meeqqaminnik naalliutsitsisinnaanerat naapertuutinngitsumillu pinnissinnaanerat pinaveersaartinniarlugu.

Inuusamik paaqqutaqartarneq inuusuttut angajoqqaanngornerup qanoq ittuuneranik piviusorsiortumik paasitinneqassapput. Suliniummi siunertaq pingaarutilik tassaavoq kissaatiginngissamik naartulertarnerit pinaveersaartinneqarnissaat kissaatigisamillu meerartaarusulluni naartusarnerit siuarsarneqarnissaat. 9.-11. klassimi atuartut atuartinneqartarput naalungiarsunnik isumaginninneq angajoqqaatullu inissisimaneq atuartitsissutigineqartarluni, tamatumalu kingorna atuartut inuusamik elektroniskiusumik naalungiarsuittulli paaqqutarisariaqarlunilu paarisarialimmik tunineqartarlutik. Inuusamik paarsinerup kingorna atuartut atoqatigiittarneq naartunaveersaarnerlu pillugit atuartitsinermut peqataasarput.

Suliniutit taakku pingasut suleqatigiissutigineqarnerini Peqqissutsimut Naalakkersuisoqarfik peqqinnissaqarfik aqqutigalugu najukkami ernisussiortunik, ernisussiornermi inunnik pingaarutilinnik kiisalu meeraaqqerisunik ikiorteqartitsisarpoq.

Isumaginninnermut Naalakkersuisoqarfik 1 mio. kr.-inik tapiissuteqarpoq 2010-mi sulisut akissarsiaannut aningaasartuutinut, kiisalu suliniummut ” Inuusamik paaqqutaqartarneq” inuusanik 100-nik pisinermut atugassanik.

PAARISA ininik atugassaqartitsivoq 1,2 mio. kr.-inillu tapiissuteqarluni. PAARISA suliniutit piviusunngortinneqarnissaannik, kiisalu suliniutit aqunneqarnerannik suliniutinillu ataqatigiissaarinermik isumaginnittuuvoq. Tamatuma saniatigut suliniutit pingasut taakku naliliiffigineqarnissaat PAARISA-p qularnaassavaa.