Peqqissaanikkut nutaarsaaneq pillugu isumasioqatigiinneq

2. februar Peqqissutsimut Naalakkersuisup, Agathe Fontainip aaqqissugaanik isumasioqatigiinneq ingerlanneqarpoq Peqqissutsimut Ataatsimiititaliap, naalakkersuisoqarfimmi sulisut aammalu peqqinnissaqarfimmeersut peqataaffigisaat.

Isumasioqatigiinnerup siunertaraa peqataasut peqqissaanikkut nutarsaanerup killiffianik paasissutissinnissaat aammalu periarfissinnissaat suliaq pillugu apeqquteqarnissaannut. Isumasioqatigiinnermi saqqummiisoqartarpoq nutarsaanerup ingerlaneranik nassuiaatinik aammalu siunissami peqqissaanikkut neqeroorutissat qanoq aaqqissuunneqarnissaannik imalinnik.

- "Uannut pingaaruteqarpoq peqqissaanikkut nutarsaaneq pillugu suliat isertuaatsumik ingerlanneqarnissaat. Nuannaarutigaara Peqqissutsimut Ataatsimiititaliami ilaasortat ilaasa isumasioqatigiinnermut peqataanissartik pingaartissimammassuk, taamaaliornermikkullu iluarsaaqqinnerup killiffia pillugu apeqquteqarnissaminnut periarfissaqarsimallutik. Peqqissaanikkut nutarsaaneq pillugu Inatsisartuni ilaasortaqatinnut attaveqarluarnerma nangeqqinnissaa aamma qilanaaraara," Peqqissutsimut Naalakkersuisoq Agathe Fontain oqarpoq.

1. januar 2010 aallarnerfigalugu Qeqqata Peqqinnissaqarfiani aamma Qeqertarsuup Tunuata Peqqinnissaqarfiani ukioq ataaseq misileraalluni ingerlatsinissat aallarnerneqarput. Peqqinnissaqarfinni misileraaffiulersuni siuttuusut misilittakkatik ilimasuutitillu pillugit isumasioqatigiinnermi saqqummiipput.

- "Peqqissaanikkut nutarsaaneq suliarujussuuvoq peqataasunit tamanit tunniusimalluinnarluni suleqataaffigineqartussaq, minnerunngitsumik peqqinnissaqarfimmi atorfillit eqqarsaatigalugit. Peqqinnissaqarfiit misileraaffiulersut Qeqqata Peqqinnissaqarfiata aamma Qeqertarsuup Tunuata Peqqinnissaqarfiata saqqummiussinerisa takutippaat taakkunani sulisuusut tunniusimallutik aalajaallutillu iluarsaaqqinnerup siunertaanik a-nguniagaqartut, tassalu innuttaasunut sumiluunniit najugaqartunut pitsaanerpaamik peqqissaanikkut sullissinissaq. Misileraaffiusut misilittagaat ajunngitsut pitsaavallaan-ngitsullu tamarmik pingaarutilerujussuupput nutarsaanerup aallartivinnissaata tunngavissinnissaanut," Peqqissutsimut Naalakkersuisoq Agathe Fontain nassuiaavoq.