Utaqqisuniittut 311-nik suliarinninnikkut ikilisinneqassapput

Utaqqisuniittut immikkut ikilisarneqarnissaannut ilassutitut aningaasaliissuteqarneq tunuliaqutaralugu peqqinnissaqarfiup Island, Frederiksværkimi Arresødal Privathospital, kiisalu Københavnimi Øjenlægernes Hus suleqateqarnissamik isumaqatigiissuteqarfigai.

Suleqatigiinnissamik isumaqatigiissutip kingunerai:

· 2009-mi decembarimi isip igalaasartaata qasertittarneranut 85-inik suliarinnittoqarnera. Suliarinninnerit taakku Sisimiuni pipput

· Islandip 2010-mi maajip qaammataaniit napparsimasunik isimikkut immikkut suliaritittariaqartunik 20-nik suliarinninnissaa

· Arresødal Privathospitalip tutsarissaataasumik 100-nik suliarinninnissaa. Tassani suliaritittussat siulliit 2010-mi januaarip naanerani suliarineqarnissaat naatsorsuutigineqarpoq

· Arresødal Privathospitalip 70-inik seeqquusaliinissaa. Napparsimasunut angerlareernerminni timikkut sungiusaasumit sungiusarteqqinneqarnissamut periarfissaqanngitsunut tunngatillugu sungiusaaqqinneq tamarmiusoq Arresødal Privathospitalimi pissaaq. Suliarinninnerit siulliit 2010-mi februaarip aallartinnerani pissapput.

Avataanit suleqatinik isumaqatigiissutit taakku saniatigut peqqinnissaqarfik pilattaasartumik avataaneersumik sap.ak. 8-mi 9-milu napparsimasunut 36-nut seeqqup ujalorsuanik tuinillu suliarinninnissamut tunngasuni utaqqisunik immikkut ikilisaasussamik isumaqatigiissuteqarpoq. Taamatut suliaritittussat Ilulissani suliarineqassapput.

Ilassutitut aningaasaliissuteqartoqarneratigut suliaritinnissamut utaqqisut 311-nik ikilisinneqassapput.

- ”Maanna suliaritinnissamut utaqqisut ikilerujussuartinneqarnissaat naammagisimaartorujussuuara. Utaqqisut ikilisinneqarnissaat Naalakkersuisunit pingaartinneqartorujussuuvoq. Inuiaqatigiinnut innuttaasunullu inuit, sulinermi akissarsiassaraluanik inuunerullu pitsaassusaanik annaasaqaataasumik suliaritinnissamut ukiorpassuarni utaqqisarnerat nuanninngilluinnarpoq”, Peqqissutsimut Naalakkersuisoq Agathe Fontain oqarpoq.