Pujortarneq pillugu inatsit nutaaq

Inatsisip siunertaraa inuit peqqissusaasa siuarsarneqarnissaa, piumassuserinngisaminnillu inuit allat tupamik pujortarnerisa pujuanik najuussuinerup ajoqutaasumik kingunerisaanik sunnerneqannginnissaat. 

Pujortarnermik inerteqquteqarneq pillugu inatsit isumaqarpoq, immikkut ittumik inatsimmi allamik allassimasoqanngippat, illut iluini piffinni inatsisip atuuffiiniittuni tupamik pujortarnissaq inerteqqutaasoq.

Pujortarnermik inerteqquteqarneq pillugu inatsit tunuliaqutsiullugu illup iluani ininik pujortartarfissanik pilersitsinissaq atuinissarluunniit inerteqqutaalerpoq, immikkullu ittunik pisoqartillugu akuersissutinik tunisisoqarsinnaajunnaarluni.

Sulliviit sullissiviilluunniit pujortarnermut inerteqqut pillugu inatsimmut ilaatinneqartut silami pujortartarfissanik pilersitsinissaminnut periarfissaqarput.

Namminerisamik angerlarsimaffinni pisortanit kiffartuussivigineqartartuni, assersuutigalugu angerlarsimaffimmi ikiorteqartartuni, ikiorneqarnissamut piumasaqaataasinnaavoq najugaqartoq piffissami ikiortip najuunnerata nalaani pujortassanngitsoq.

Inatsit nuna tamakkerlugu atuuppoq, taamaallaat Pituffimmi sakkutooqarfik pinnagu, taanna USAp, Danmarkip, Kalaallit Nunaatalu naalakkersuisuisa akornanni illersornissamut isumaqatigiissummut ilaammat.

Pujortarneq inerteqqutaavoq
1. oktober 2010-miit piffinni makkunani pujortarneq inerteqqutaalerpoq:

• Pisortat suliffeqarfiutaat tamarmik, aammalu namminersortut suliffeqarfiutaat qulinik amerlanerusunilluunniit sulisoqartut
• Ilinniarfiit, meeqqeriviit, taakkununnga ilanngullugit ullukkut meeqqanik paarsaqartartut, ulloq unnuarlu paaqqutarinniffiit, paaqqutarinniffiit angerlarsimaffiutigisut, ilinniartut najugaqarfii sullissiviillu assigisaat
• Init kikkunnit tamanit najorneqartartut
• Peqatigiiffiit namminersortut klubbillu, taakkununnga ilanngullugit piniariartartut klubbii, imarsiortut peqatigiiffii billardklubbillu
• Angallassissutit kikkunnit tamanit atorneqartartut taxallu
• Imerniartarfiit, neriniartarfiit, kaffisorniartarfiit, sassaallertarfiillu kikkunnit tamanit orninneqartartut allat
• Init pisortanit pigineqartut, assersuutigalugu inissiaqarfinni pisortanit pigineqartuni init nalliuttorsiorfiusartut
• Akunnittarfinni ineeqqat, umiarsuarni ineeqqat, akunnittarfinni inissiat, vandrehjemmini ineeqqat unnuisarfiillu assigisaat
• Umiarsuit Kalaallit Nunaanni najugaqavissut

Pujortarnermik inerteqquteqarneq pillugu inatsit nutaaq Peqqinnissaqarfimmut tunngasunut nittartakkami Sundhedsportalen Peqqik-mi annertunerusumik atuarsinnaavat.