Aningaasaqarnermik naatsorsuuserinermillu suliaqartussamik sulisussarsiorpoq

Aningaasaqarnermut tunngasumik ilinniagaqarpit politikkikkullu aqutsiviusumi unamminartumik atorfittaarusuppit?Taava illit ujarpatsigit!

Peqqissutsimut Naalakkersuisoqarfimmi aningaasaqarnermut naatsorsuuserinermullu suleqatissatut immikkut siunnersorterput peqatigalugu Naalakkersuisoqarfimmi aningaasaaqarnermi suliassat isumagisarissavatit. Naalakkersuisoqarfiup naatsorsuutaasa suliarineqarnerinut akisussaaqataallutillu immikkoortortap suliassaqarfiini allani aamma suleqataasassaatit. Atorfiup 1/11 2009-mi aallarnertumik isumaqatigiissuteqarnerluunniit naapertorlugu inuttalerneqarnissaa kissaatigineqarpoq.

Suliassat akisussaaffigisassallu

Suliassatit akisussaaffigisassatillu siammasissuupput, assersuutigalugu:

• Naalakkersuisoqarfimmi naatsorsuutit isumagineqarnissaannut akisussaaneq
• Naalakkersuisoqarfiup kontoinik oqimaaqatigiissaarineq
• Akiligassiissutinik assigiinngitsunik suliaqarneq
• Naalakkersuisunut Inatsisartunullu oqallisissialiornernut qinnuteqaasiornernullu suleqataasarneq, assersuutigalugu tapiissutitut aningaasaliissutissanik qinnuteqaatinik suliaqarnermut paasissutissiinernullu suleqataaneq
• Suleqatigiissitani attuumassuteqarfigisani suleqataaneq
• Missingersuutinik malitseqartitsinermut aningaasaqarnikkullu aqutsinermut suleqataasarneq

Piginnaasat

Naatsorsuutigaarput akademiøkonomitut naatsorsuuserinermilluunniit ilinniagaqartutit imaluunniit aningaasarsiornermut tunngasumik ilinniarnertuujusutit. Tamatuma saniatigut ilinnut iluaqutaassaaq:

• Politikkikkut aqutsiviusumi sulinermik misilittagaqaruit
• Naatsorsuuserinermik misilittagaqaruit
• Peqqinnissaqarfiup iluani sulinermik misilittagaqaruit soqutigisaqaruilluunniit
• Kalaallisut danskisullu oqaaseqartuuguit

Akissarsiat atorfinitsinneqarnermilu atugassarititaasut

Akissarsiat atorfininnermilu atugassarititaasut pissapput Kalaallit Nunaanni Namminersorlutik Oqartussat kiisalu kattuffigisap isumaqatiginninniarsinnaatitaasup akornanni isumaqatigiissutit atuutsinneqartut naapertorlugit. Atorfik maannakkut Nuummi inissisimavoq.

Atorfimmut atatillugu inissaqartitsisoqarsinnaavoq, ineqarnermut, qularnaveeqqusiinermut il. il. akiliutissat maleruagassat atuutsinneqartut naapertorlugit akilerneqartartussaallutik. Nuummili inissaaleqineq pissutigalugu initaarnissamut qaammatit 3-12 tikillugit utaqqinissaq naatsorsuutigineqassaaq (inissap qanoq angitiginera apeqqutaatillugu). Initaarnissavit tungaanut naalakkersuisoqarfiup akiligaanik utaqqiisaasumik ineqartinneqassaatit.

Atorfininnermi soraarnermilu angalanissaq pisattallu angallanneqarnissaat pissapput Kalaallit Nunaanni Naalakkersuisut kiisalu kattuffigisap isumaqatiginninniarsinnaatitaasup akornanni isumaqatigiissutit atuutsinneqartut naapertorlugit.